Qeveria ka shpallur “Dëshmor të Atdheut” kapitenin Arben Anamalin, drejtuesi i anijes turistike të Bashkisë Shkodër, i cili humbi jetën duke shpëtuar dy turistë izraelitë në Liqenin e Shkodrës. Lajmin e ka bërë me dije Edi Rama përmes një postim në rrjetet sociale.
Më 8 Korrik, 15 turistë të huaj të nisur nga Shiroka, kërkuan që të shijonin me not liqenin dhe refuzuan të dëgjojnë kërkesën e kapitenit Arben Anamali për të mos u futur në ujë, sepse era që vinte nga veriu ishte e rrezikshme. Pak minuta pasi ata u hodhën në ujë, kërkuan ndihmë, pasi era i kishte larguar rreth 50 metra larg nga anija.
Kapiteni Arben Anami u hodh në liqen me dy kamerdare shpëtimi, por pasi arriti të shpëtonte dy turistët izraelitë, mbeti vetë, pa mundur të kthehet për shkak të erës së fortë, e cila e shtynte në thellësi të liqenit. Trupi i pajetë u gjet mëngjesin e sotëm pas më shumë se 48 orësh kërkime në liqen.
