Trajneri i Partizanit, Skënder Gega, e ka parë barazimin ndaj Nomme Kalju në transfertë vetëm si hapin e parë drejt kualifikimit të mëtejshëm në Ligën e Konferencës.
Tekniku i të kuqve theksoi pas sfidës se nuk kishte mbaruar asgjë dhe se ekipi duhej të çonte punën në fund në ndeshjen e kthimit në Tiranë.
“Ndeshje e vështirë, jashtëzakonisht e vështirë. E filluam edhe pak me probleme se patëm edhe dëmtimin e Kekos. Të them të drejtën është një nga lojtarët që kohët e fundit ka dhënë një impuls tjetër në ekip, ashtu e kishim ndërtuar ekipin. Siç erdhi loja besoj se ishte e drejtë. Ndoshta shumica e njerëzve nuk dinte çfarë ekipi ka Kalju, mua më pëlqente si ekip. Mos të harrojmë se kishim në fushë edhe 16-vjeçarë, risi për Partizanin, kjo na jep optimizëm. Ndeshjen e dytë do ta kemi në fushën tonë me tifozët tonë, në atë ditë do të kemi edhe Isgandarli që për arsye që dini nuk u aktivizua. Shpresoj që edhe Kekon ta kemi e të bëhemi të plotë.
Në krahasim me Shqipërinë, favori është se ishte freskët, fusha ishte e mirë, era është për dy ekipet. Por nuk besoj se është koha ajo që mund të zbehë impenjimin e performancën, për mua është e rëndësishme të shkojmë e marrim masat që kemi për ndeshjen tjetër, edhe për dëmtimet.
Kam parë tre ndeshjet e fundit të tyre, personalisht jam shprehur që është ekip që duhet vlerësuar në maksimum. Vazoja jonë është e kaluara e Partizanit, mua më shqetëson gjendja aktuale e ekipit. Klubi po punon, kemi nevojë për të riparuar e përforcuar, por të shohim të kthehemi të qetë e bëhemi gati për ndeshjen e dytë dhe nuk besoj se është e lehtë.
Goli i Skukës? Skuka i ka ato vlera. Jemi munduar në stërvitje, edhe pse ajo nuk është 100%, por në ato zona ai është shumë special. e tregoi veten sot. Me atë sulmuam, po të ishte edhe Keko… Për herë të parë luajti Garsia, hera e parë me fanellën e Partizanit, Garsia është për herë të parë me fanellën e Partizanit. Në stërvitje është komplet ndryshe, më bëhet qejfi që u angazhua shumë shpejt, edhe Karlos Martinez.
Besoj se bënë mirë, Nuk mund të veçoj, por këta janë të rinj dhe është hap i mirë për ne. Si ekip u munduam të luajmë në grup, shfrytëzojmë aftësitë në kundërsulm, por edhe mosha e re të bën optimist. Ishim gjithmonë nën tension se nuk doja që t’i jepnim hapësira të flitej për 16-vjeçarë se e kuptoj. Jam me Partizanin dhe për sa kohë do të jem në këtë profesion, do të mbështes ata që e meriojnë dhe jo nga mosha e statusi i tyre.
Malaj, Himallari dhe Vata? Është vlerësim përderisa shoh që kanë parametra të mirë, edhe në aspektin fizik, mosha e eksperienca. Dikush duhet t’u japë dorën, kjo është baza e Partizanit, gradualisht do kenë minutazhin, do rriten shpejt dhe do jenë investimi i Partizanit. Unë e bëj me shumë dëshirë, me shumë besim. Por e rëndësishme është që e gjithë pjesa tjetër me eksperiencë të japin maksimumin e të jenë të vëmendshëm, por edhe të sakrifikojnë.
I tillë është futbolli, kemi bërë vetëm ndeshje miqësore, jo zyrtare, nuk janë tregues shumë i madh se në miqësore përdorim dy 11-she. Tani të gjithë janë aktivë e të gatshëm. Shpresoj që Keko të rikuperohet sa më shpejt, kemi edhe Isgandarli që do jetë forcë e shtuar. E njihja kundërshtarin e vështirësinë, u mundova t’ia shpjegoj ekipit që kanë vendosje të mirë e filozofi loje, por do të bëjmë më mirë.
Kjo është pjesa e parë. Avantazhi është që jemi në shtëpi, tifozët tanë, “Air Albania” të jep mundësi të japësh 100 përqind. Për këta, temperatura mund të jetë armiku më i madh i tyre. Do të jetë pjesa e dytë e kësaj ndeshje, gjithçka do të jetë e hapur, kam besim që do ia dalim”, tha Gega pas përfundimit të ndeshjes në Talin. /Panoramasport
