Një 44-vjeçar shqiptar, i shumëkërkuar nga drejtësia italiane si drejtues i një organizate të trafikut ndërkombëtar të drogës, është ekstraduar nga Dubai drejt Italisë. Ai është zbarkuar me pranga në aeroportin Fiumicino të Romës nga agjentët e Interpol-it të cilët udhëtuan në Emiratet e Bashkuara Arabe për ta marrë në dorëzim.
Operacioni është koduar “Tornado” dhe bazohet në një urdhër-arresti të lëshuar nga Prokuroria e Breshias në kuadër të një hetimi të Guardia di Finanza. Sipas autoriteteve, shqiptari dyshohet si një nga drejtuesit kryesorë të një grupi të strukturuar kriminal të përfshirë në trafikun ndërkombëtar të narkotikëve.
Përmes bashkëpunimit të Shërbimit të Bashkëpunimit Policor Ndërkombëtar të Drejtorisë Qendrore të Policisë Kriminale dhe përfaqësuesit të sigurisë në Abu Dhabi, u arrit marrëveshja për ekstradimin, i cili u krye më 4 korrik. I dyshuari është dërguar në paraburgim në Breshia, ku do të përballet me drejtësinë italiane.
Vetëm një muaj më parë, po nga Dubai u ekstradua edhe një tjetër shqiptar, Fatjon Gjonaj, i kërkuar nga Prokuroria e Milanos si pjesë e një organizate të ngjashme narkotrafiku në zonën e Lombardisë.
