Transferimi i Viktor Gyokeres tek Arsenal nuk ka për të qenë aq i lehtë sa mendohej javën e kaluar, kur u tha se sulmuesi i Sporting Lisbonë ishte pranë kalimit në Premier League.
Mësohet se Sporting i ka thënë drejtuesve të Arsenal se dëshiron 70 milionë euro plus 10 milionë euro në bonuse për Gyokeres. Lajmi është konfirmuar sot nga e përditshmja “The Guardian”.
Kampionët portugezë thuhet se kanë refuzuar një ofertë nga “Topçinjtë” për sulmuesin me vlerë 65 milionë euro plus 15 milionë euro bonuse për ndërkombëtarin suedez.
Pretendohet se pas një mosmarrëveshjeje që ka zgjatur me javë, klubet janë në dialog konstruktiv dhe afër përfundimit të sagës, me trajnerin e Arsenal, Mikel Arteta, që dëshiron që marrëveshja të përfundojë sa më shpejt.
Arsenali është i inkurajuar edhe nga dëshira e lojtarit për t’u bashkuar, me kushtet personale që nuk pritet të jenë problem. Gyokeres ka rënë dakord për pagën e tij me klubin e Londrës veriore.
Gyokeres do të kthehet në Sporting për para-sezonin të premten pasi klubi i dha atij leje për të shtyrë kthimin e tij. Megjithatë, nuk ka siguri se ai do të kthehet fare.
