Avokati i Jamarbër Malltezit, Klodian Skënderi ka dorëzuar mëngjesin e sotëm në SPAK vërtetimin e depozitimit për llogari të Gjykatës së Posaçme shumën e garancisë për zëvendësimin e masës së sigurisë.
Tashmë pritet që prokurorët e çështjes të bëjnë urdhrin e ekzekutimit të lirimit të Jamarbër Malltezit nga “arresti shtëpiak”.
Një ditë më parë, Gjykata e Posaçme vendosi të lironte nga masa e sigurisë “Arrest në shtëpi”, Jamarbër Malltezin, dhëndrin e Sali Berishës, i cili është marrë i pandehur për dosjen e privatizimit të ish-kompleksit sportiv “Partizani”.
Vendimi u mor nga gjyqtarja Elsa Ulliri, ku arresti i shtëpisë i është zëvendësuar Malltezit me garanci pasurore prej 3 milionë lekësh të reja.
Jamarbër Malltezi akuzohet për kryerjen e veprës penale “Korrupsion pasiv i funksionarëve të lartë shtetërore ose të zgjedhurve vendorë”, kryer në bashkëpunim, si dhe për “Pastrim të produkteve të veprës penale ose veprimtarisë kriminale”.
Ai u arrestua nga Policia me urdhët të SPAK që mbrëmjen e 21 Tetorit të vitit 2023, në aeroportin e Rinasit, teksa ishte duke pritur bashkëshorten. Ndërkohë, më 21 Nëntor të vitit 2023, Gjykata e Posaçme e Apelit i ndryshoi masën e sigurisë nga “arrest me burg” në “arrest shtëpie”.
Seanca e radhës për dosjen “Partizani”, do të mbahet më 21 korrik 2025. E para dështoi, pasi kryetari i Partisë Demokratike, Sali Berisha nuk ishte njoftuar zyrtarisht për të shkuar në gjyq.
Sali Berisha akuzohet për veprën penale “Korrupsion pasiv i funksionarëve të lartë shtetërore ose të zgjedhurve vendorë”, kryer në bashkëpunim.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”.
Organi i akuzës akuzon Malltezin për përfitimin e të ardhurave në vlerën e 5.4 milionë eurove nga një biznes ndërtimi, falë vendimeve të qeverisë të marra nga vjehrri i tij.
Në të njëjtën çështje, i pandehur për korrupsion aktiv është marrë edhe biznesmeni i ndërtimit, Fatmir Bektashi, ndërsa Xhimi Begeja dhe Andia Pustina akuzohen për pastrim parash. Si të pandehur në këtë çështje për akuzën e pastrimit të parave janë edhe shoqëritë Studio Pustina sh.p.k., Homeplan sh.p.k. dhe Kontakt sh.p.k.
Deri më tani, si Berisha, po ashtu edhe Malltezi, e kanë konsideruar si një gjyq politik me urdhër të Edi Ramës.
