Roman Starovoit, ish-ministri rus i Transportit, u gjet i vdekur në makinën e tij jashtë Moskës vetëm disa orë pas publikimit të dekretit presidencial që e shkarkonte nga detyra. Hetuesit shtetërorë dyshojnë se ai mund të ketë kryer vetëvrasje, pasi trupi i tij u gjet me plagë të shkaktuara nga armë zjarri.
Kremlini reagoi menjëherë pas lajmit, duke e cilësuar vdekjen si një “ngjarje tragjike dhe tronditëse”. Zëdhënësi Dmitry Peskov deklaroi se presidenti Vladimir Putin është informuar mbi incidentin, por nuk pranoi të spekulonte për rrethanat e vdekjes, duke theksuar se hetimet janë në vijim.
“Nuk ka si të mos i shokojë njerëzit normalë. Kuptohet, na tronditi edhe ne. Një hetim është duke u zhvilluar dhe do t’i japë përgjigje të gjitha pyetjeve”, u shpreh Peskov.
Dekreti i shkarkimit të Starovoit, i publikuar dje, nuk përmbante asnjë shpjegim për largimin e tij nga posti, që ai e mbajti vetëm për një vit. Megjithatë, sipas analistëve politikë, shkarkimi mund të jetë i lidhur me një hetim për korrupsion në rajonin e Kurskut, të cilin Starovoit e kishte drejtuar për pesë vite para se të emërohej ministër në maj 2024.
Agjencia Reuters raportoi se nuk mundi të verifikonte në mënyrë të pavarur akuzat, por një burim nga industria e transportit, që foli në kushte anonimiteti, tha se pozicioni i Starovoit ishte vënë në pikëpyetje muajt e fundit, për shkak të një hetimi mbi fondet e destinuara për forcimin e kufirit ruso-ukrainas në rajonin Kursk.
