Është hapur për herë të parë gara për Drejtor Departamenti të Sigurisë Publike në Policinë e Shtetit. Afati i fundit për aplikantët është deri më 15 korrik.
Oficeri i policisë që do të shfaqë interes, për të drejtuar një nga postet më të rëndësishme në Policinë e Shtetit, duhet të ketë domosdoshmërisht gradat “Drejtues” dhe “Drejtues i parë”. Përveç këtij kriteri bazë, aplikanti duhet të ketë shtetësi shqiptare dhe të mos ketë qenë i dënuar me vendim të formës së prerë. Po ashtu, brenda 3 viteve të fundit, të mos ketë masa për shkelje të rënda disiplinore, të jetë në kushte të mira shëndetësore për të kryer detyrën, si dhe të mos ketë konflikt interesi në ushtrimin e detyrës, në përputhje me legjislacionin me konfliktin e interesit.
Deri më tani këtë post e mban Rebani Jaupi, i cili pritet për t’u parë nëse do të jetë pjesë e garës ose jo.
Pas fazës së aplikimeve, do të nisë verifikimi i dokumentacioneve, dhe më pas Komisioni do të bëjë intervistimin dhe pikëzimin e secilit prej tyre.
Gara për drejtuesit e tjerë të departamenteve të Policisë së Shtetit nuk është hapur ende, por për shkak të ligjit të ri për Policinë e Shtetit, gara do të hapet një nga një për çdo departament, si ai Policisë Kriminale, i Departamentit për Marrëdhëniet Ndërkombëtare, i Departamentit për Kufirin dhe Migracionin dhe për zv. Drejtor të Përgjithshëm të Policisë së Shtetit.
Edhe pse ligji është futur në fuqi më datë 16 tetor 2024, prej 9 muajsh gara për drejtorët e departamenteve më të rëndësishme në Drejtorinë e Përgjithshme të Policisë u mbajt pezull.
