Presidenti rus Vladimir Putin deklaroi sot më 6 korrik se “sistemi unipolar i marrëdhënieve ndërkombëtare, që shërbente interesave të vendeve më të pasura, po bëhet pjesë e së kaluarës”.
Këtë deklaratë ai e bëri gjatë një video-konference në samitin e BRICS-it që po mbahet në Rio de Janeiro të Brazilit.
Sipas Putinit, unipolarizmi po zëvendësohet nga një botë shumëpolare më e drejtë.
“Bota po kalon ndryshime epokale”, theksoi kreu i Kremlinit.
Duke cituar agjencinë ruse Tass, Putin nënvizoi se vendet e BRICS-it përfaqësojnë pothuajse gjysmën e popullsisë globale dhe rreth 40% të ekonomisë botërore, me një Prodhim të Brendshëm Bruto të përbashkët prej 77 trilionë dollarësh, krahasuar me 57 trilionë të vendeve të G7-ës.
“Sistemi ekonomik global po ndryshon me shpejtësi. Çdo gjë tregon se modeli i globalizmit liberal po e humbet funksionin e vet”, tha Putin, duke shtuar se “qendra e aktivitetit ekonomik po zhvendoset drejt tregjeve në zhvillim, çka po gjeneron një valë të fortë rritjeje, përfshirë edhe në vendet e BRICS-it”.
Kujtojmë se samiti i BRICS-it po mbahet në Brazil, por ka një mungesë të rëndësishme, atë të presidentit të Kinës, Xi Jinping. Ndryshe nga samitet e tjera këtë herë ai nuk ka marrë pjesë.
