Presidenti i Izraelit, Isaac Herzog, ka zhvilluar sot një takim me kryeministrin Benjamin Netanyahu, pak para nisjes së këtij të fundit drejt Uashingtonit, ku pritet të takohet me presidentin amerikan, Donald Trump.
Gjatë takimit, presidenti Herzog theksoi rëndësinë e arritjes së një marrëveshjeje për lirimin e pengjeve dhe për një armëpushim në Rripin e Gazës. “Mbështes përpjekjet për një zgjidhje, edhe nëse ato përfshijnë vendime të vështira dhe me kosto. Sfida është e madhe, por e nevojshme”, deklaroi ai, sipas agjencisë ANSA.
Netanyahu do të niset nga Izraeli pasditen e sotme, ndërsa takimi me presidentin Trump pritet të mbahet të hënën në mbrëmje në Washington. Ora e takimit nuk është konfirmuar zyrtarisht.
Ndërkohë, një delegacion negociator izraelit ndodhet në Doha për bisedime indirekte me Hamasin, të ndërmjetësuara nga Katari, SHBA dhe Egjipti.
Synimi është arritja e një armëpushimi dy-mujor dhe vendosja e kushteve për një marrëveshje më të gjerë që mund t’i japë fund konfliktit.
