Presidenti i Paris Saint-Germain, Nasser Al-Khelaifi, ka dhënë një deklaratë të fortë në lidhje me çmimin Topi i Artë për sezonin futbollistik 2024/25, i cili do të ndahet më 22 shtator në Paris, menjëherë pas përfundimit të Botërorit për Klube.
Pavarësisht se favoritët për çmimin më prestigjioz individual nuk janë ende të qartë, me emra si Lamine Yamal, Raphinha, Vitinha dhe Donnarumma në garë, Al-Khelaifi e ka bërë të qartë se për të, fituesi duhet të jetë vetëm një: Ousmane Dembélé.
Gjatë një interviste të dhënë për RMC Sport, pas një seance stërvitore të PSG-së në kampusin e Universitetit të Kennesaw në Atlanta, Al-Khelaifi u shpreh:
“Nëse Ousmane Dembélé nuk e fiton Topin e Artë, ka diçka që nuk shkon. Ai ka bërë një sezon të jashtëzakonshëm, të mrekullueshëm. Nuk kam asnjë dyshim se e meriton këtë çmim. Nëse nuk e fiton, atëherë kemi një problem serioz.”
Presidenti i klubit parizien shtoi më tej se përveç formës së shkëlqyer individuale, më e rëndësishmja është që çdo lojtar të japë maksimumin për skuadrën.
PSG është shpallur kampione e Europës dhe aktualisht ndodhet në garë për të fituar edhe Botërorin për Klube, ndaj nuk është çudi që çmimi të përfundojë në duart e një lojtari të klubit francez. Dhe sipas Al-Khelaifit, askush nuk e meriton më shumë se Dembélé.
