Planet e Akon për të ndërtuar një qytet futurist në Senegal janë fshirë dhe tanimë ai do të fokusohet në diçka më realiste.
“Projekti i Qytetit Akon nuk ekziston më”, tha për BBC drejtuesi i trupit të zhvillimit të turizmit në Senegal, Serigne Mamadou Mboup. “Fatmirësisht, është arritur një marrëveshje midis Sapco dhe Alioune Badara Thiam (Akon). Ajo që ai po përgatit me ne është një projekt realist që do të mbështetet plotësisht nga Sapco.”
Akon, i cili lindi në SHBA dhe kaloi një pjesë të jetës në Senegal, prezantoi dy projekte ambicioze në vitin 2018 që përfaqësonin të ardhmen e shoqërisë afrikane.
I pari ishte Qyteti Akon që kushtonte rreth 6 miliardë dollarë. Ai duhet të realizohej përmes një nisme, një kriptomonedhe të re të quajtur Akoin.
Skicat e para të qytetit shfaqnin qiejgërvishtës të lakuar, si në filmat fantashkencorë. Pas pesë vitesh, hapësira prej 800 hektarësh në Mbodiène është ende bosh. E vetmja ndërtesë është një objekt i papërfunduar pritjeje. Nuk ka rrugë, shtëpi dhe as sistem elektrik.
“Na u premtuan punë dhe zhvillim”, tha një banor. “Në të vërtetë, asgjë s’ka ndryshuar.”
Kriptomonedha Akoin nuk ia ka arritur të shlyejë investitorët dhe Akon është shprehur: “Nuk po menaxhohej si duhej, mbaj përgjegjësi të plotë.”
Ka pasur edhe pyetje nëse do të ishte e ligjshme që Akoin të ishte metoda kryesore e pagesës për banorët e Qytetit Akon. Senegali përdor frangën CFA që prodhohet nga Banka Qendrore e Shteteve të Afrikës Perëndimore dhe ashtu si shumë banka qendrore, ka shprehur kundërshtim për kriptomonedhat.
Në fazën e parë mendohej të ndërtohej një spital, qendër tregtare, shkollë, komisariat, qendër mbeturinash dhe panel diellor, deri në fund të vitit 2023.
Qyteti me teknologji të lartë duhej të funksiononte vetëm me energji të ripërtëritshme. Por pavarësisht këmbënguljes së Akon se projekti “ishte 100,000% në lëvizje”, nuk pati asnjë ndërtim pas ceremonisë inaguruese të tij.
Qeveria vendase ka konfirmuar dyshimin, projekti u zvarrit. Arsyet kryesore për të ndaluar ndërtimin është mungesa e fondeve.
Edhe pse ideja origjinale është lënë pas, qeveria thotë se tani po bashkëpunon me Akon në një projekt zhvillimi “më realist”. Toka pranë Mbodiène ka vlerë të lartë strategjike, sidomos me afrimin e Lojërave Olimpike Rinore në vitin 2026 dhe pritshmëritë për të rritur turizmin.
