Gazetari Dritan Laçi u shpreh se vend depozitimi i mbetjeve në Elbasan sot duhet të ishte një skenë krimi.
I ftuar në Ora News, Laçi tha se zjarrvënia ndodhi menjëherë pasi nis një hetim ndaj “Eco Alb” e Leli Kajës.
“Me një hetim kryesisht SPAK mund ta marrë në zotërim këtë dosje. Pra edhe Prokuroria e Elbasanit mund të shpallë moskompetencën e vet përsa i përket hetimeve. Vend depozitimi i mbetjeve në Elbasan duhet të ishte një skenë krimi e gjitha. Vetë fakti që vatra e zjarrit nis në qendër të saj, të lë gjithmonë dyshimin se mund të kemi të bëjmë me një piromani të qëllimshme.
Dhe kjo ndodh menjëherë pasi nis një hetim ndaj “Eco Alb”. Pra tre ditë pasi nis një hetim ndaj ‘Eco Alb’, ka një zjarrvënie të tillë. E cila në fakt nuk është e para që ndodh në Elbasan. Pavarësisht se kjo nuk është vetëm situata në Elbasan. Sepse kjo situatë është edhe në Vlorë. Kjo situatë para 2 vitesh ishte edhe në Fier. Një situatë e tillë është edhe në landfillin e Tiranës“, tha Laçi.
“Eco-Elb” e Leli Kajës nën hetim nga Prokuroria e Elbasanit
Landfilli dhe inceneratori jo-funksional i Elbasanit, gjenden rreth 2 kilometra në të djathtë të aksit rrugor që lidh Bradasheshin me Unazën e qytetit. Ato menaxhohen nga kompania publike “Eco-Elb”, në pronësi të 7 bashkive përbërëse të qarkut Elbasan, dhe administrohet nga Leli Kaja.
Aktualisht, “Eco-Elb” e Leli Kajës është nën hetim nga Prokuroria e Elbasanit, një hetim që mori pikënisje pikërisht nga një zjarr vënie e qëllimshme. Hetimi fillimisht nisi në vitin 2023 për “Shkatërim i pronës me zjarr” dhe “Ndotjes së ajrit”, por tashmë rezulton të jetë shtrirë thellë në aktivitetin ekonomik të kësaj kompanie dhe në 7 bashkitë që janë pronare.
Kompania “Eco-Elb”, e krijuar nga të gjitha bashkitë e qarkut për të menaxhuar dhe inceneruar mbetjet urbane, “Eco-Elb”, mori në dorëzim në fund të vitit 2021 landfillin dhe inceneratorin e Elbasanit, pas skandalin financiar, ku u përfshinë zyrtarë të niveleve të ndryshme dhe pronarët në letra dhe ata faktikë të kompanisë koncesionare “Albtek Energy”, e kontraktuar nga qeveria e Edi Ramës për ndërtimin e kësaj vepre publike.
Por, sipas një hetimi të Prokurorisë së Elbasanit, besohet se edhe kompania “Eco-Elb” është kthyer në një gropë financiare, ku janë shpenzuar 9 milionë euro fonde publike, pa kryer asnjë shërbim real në teren.
Qytetarët kanë paguar taksa për pastrimin e mbetjeve, ndërsa mbetjet janë lënë të përhapura në natyrë dhe paratë e taksapaguesve, kanë përfunduar në xhepat e një rrjeti të ngushtë individësh të lidhur me pushtetin lokal.
“ECO-ELB” kishte si mision përpunimin dhe incenerimin e mbetjeve, një shërbim jetik për komunitetin dhe mjedisin në qarkun e Elbasanit. Por hetimet kanë zbuluar se pavarësisht pagesave të vazhdueshme dhe deklarimeve financiare optimiste, shërbimi nuk është kryer realisht në teren.
Në vend të impianteve funksionale, ekziston vetëm një mekanizëm fiktiv për të gjeneruar fatura dhe për të zhdukur fondet publike.
Sipas hetimeve kompania merret vetëm me administrimin dhe grumbullimin e mbetjeve në ambientet e hapura të inceneratorit, por nuk jep shërbimin e djegies së mbeturinave, pasi inceneratori i Elbasanit, nuk punon.
