Forcat izraelite i kanë vrarë të paktën 67 njerëz në Rripin e Gazës të hënën, duke kryer sulme ajrore në pjesë të ndryshme të territorit palestinez, thanë dëshmitarët, spitalet dhe zyrtarët shëndetësorë.
Një sulm ajror goditi kafenenë Al-Baqa në qytetin e Gazës, kur ajo ishte e mbushur me gra dhe fëmijë, tha Ali Abu Ateila, i cili ndodhej brenda.
“Pa paralajmërim, papritmas një avion luftarak goditi vendin, duke e shkundur sikur të ishte tërmet”, tha ai.
Të paktën 30 njerëz u vranë dhe dhjetëra u plagosën në kafene, tha Fares Awad, kreu i shërbimit të urgjencës dhe ambulancës së Ministrisë së Shëndetësisë në veri të Gazës.
Awad tha se shumë prej të plagosurve janë në gjendje të rëndë. Dy sulme të tjera në një rrugë të qytetit të Gazës vranë 15 njerëz, sipas Spitalit Shifa, i cili mori viktimat.
Kafeneja, një nga bizneset e pakta që kanë vazhduar punën gjatë luftës 20-mujore, ishte një vend takimi për banorët që kërkonin qasje në internet dhe për t’i mbushur bateritë e telefonave të tyre.
Video në rrjetet sociale shfaqin trupa të gjakosur dhe të deformuar në tokë dhe të plagosurit që barteshin me batanije.
Ndërkohë, forcat izraelite vranë 11 njerëz që po kërkonin ushqim në jug të Gazës, sipas dëshmitarëve, spitaleve dhe Ministrisë së Shëndetësisë në Gazë.
Spitali Nasser në qytetin jugor Han Junis tha se i pranoi trupat e njerëzve të qëlluar ndërsa po ktheheshin nga një pikë e shpërndarjes së ndihmave ushqimore, e lidhur me Fondin Humanitar të Gazës (GHF), i mbështetur nga Izraeli dhe Shtetet e Bashkuara.
Në këtë mënyrë janë vrarë mbi 500 palestinezë gjatë muajit të fundit në këtë program kaotik dhe kontrovers të shpërndarjes së ndihmave.
Të shtënat ndodhën rreth 3 kilometra larg vendit të GHF në Han Junis, ndërsa palestinezët po ktheheshin nga vendi përmes rrugës së vetme të qasshme. Palestinezët shpesh detyrohen të udhëtojnë distanca të gjata për të arritur në qendrat e GHF në shpresë për të marrë ndihma.
Spitali Nasser tha se një person tjetër u vra pranë një qendre të GHF në qytetin jugor Rafah.
Dhjetë të tjerë u vranë në një depo ndihmash të Kombeve të Bashkuara në veri të Gazës, sipas shërbimit të ambulancës dhe urgjencës të Ministrisë së Shëndetësisë.
Ushtria izraelite tha se po i rishikon informacionet rreth sulmeve.
Në të kaluarën, ushtria kishte thënë se shtie me armë në shenjë paralajmërimi ndaj personave që lëvizin në mënyrë të dyshimtë ose afrohen shumë pranë trupave, duke përfshirë edhe ata që marrin ndihma.
Izraeli dëshiron që GHF-ja ta zëvendësojë një sistem të koordinuar nga OKB-ja dhe organizata ndërkombëtare për shpërndarjen e ndihmave.
Së bashku me SHBA-në, Izraeli e ka akuzuar grupin militant Hamas për plaçkitjen e ndihmave dhe përdorimin e tyre për ta mbajtur pushtetin në enklavë. OKB-ja mohon se ka një përvetësim sistematik të ndihmave.
Hamasi është i shpallur organizatë terroriste nga Shtetet e Bashkuara dhe Bashkimi Evropian.
Ushtria izraelite tha se kohët e fundit ka ndërmarrë hapa për të përmirësuar organizimin në zonë, duke përfshirë vendosjen e gardheve të reja, sinjalizimin dhe hapjen e rrugëve shtesë për qasje në ndihma.
Izraeli thotë se godet vetëm militantët dhe fajëson Hamasin për vdekjet e civilëve, duke i akuzuar militantët se fshihen mes civilëve, pasi operojnë në zona të populluara.
Sulmet në qytetin e Gazës ndodhën ndërsa ushtria intensifikoi fushatën e bombardimeve nëpër qytet dhe kampin e refugjatëve Xhabalia në afërsi.
Të dielën dhe të hënën, Izraeli lëshoi urdhra evakuimi për zona të mëdha në veri të Gazës.
Palestinezët raportuan bombardime masive gjatë natës deri në mëngjesin e të hënës./ REL
