Një skandal mjedisor ka ndodhur në Parkun Kombëtar të Vjosës, ku në lumin e fundit të egër të Evropës është derdhur një sasi e konsiderueshme nafte, nga kompania shtetërore Albpetrol, ku gjenden rreth 150 puse aktive.
Në media u denoncuan pamjet të cilat tregonin derdhjen e naftës bruto nga “Përroi i Madh” në afërsi të Poçemit në Mallakastër, duke shkaktuar ngordhjen e gjallesave që jetojnë në këtë habitat.
Përroi mbart ndotjen nga fusha naftëmbajtëse Gorisht-Kocul. PAs publikimit të pamjeve, Policia e Vlorës nisi procedimin penal ndaj Përparim Memajt, përgjegjës sektori në pikën e dekantimit të naftës në Gorisht, pasi dyshohet si përgjegjës për ndotjen.
Në vitin 2023, Lumi Vjosa u shpall Park Kombëtar me vendim të Qeverisë Shqiptare dhe është lumi i fundit i egër në Evropë. Me derdhjen masive të naftës ajo është në rrezik.
Së fundmi ka ardhur një reagim edhe nga kompania shtetërore “Albpetrol”, e drejtuar nga Eltar Deda, dhe duket se është përgjegjësi kryesor për këtë rast dhe tenton të justifikohet.
Sipas Albpetrol, Gorisht-Koculi është një vendburim prej 60 vitesh për nxjerrjen e naftës dhe deri para pak vitesh mbetjet nuk janë trajtuar siç duhet dhe me rritjen e temperaturave në verë, njollat në lumë aktivizohen.
“Vendburimi i Gorisht-Koculit, i publikuar ditët e fundit në media, është një vendburim 60-vjeçar si pjesë e industrisë së nxjerrjes së naftës në këtë zonë. Gjatë aktivitetit kesaj zone, për 6 dekada me radhë, ky vendburim ka prodhuar mbetje te shumta, të cilat deri para pak vitesh nuk janë trajtuar sipas protokolleve teknike.
Fatqekeqisht kjo njollë aktivizohet në temperatura të larta, pasi gjatë pjesës tjeter të vitit, nuk ka rrjedhje të këtyre mbetjeve, dhe ky është një fakt tjetër që mund të provohet lehtësisht edhe nga ekspertët e mbrojtjes së mjedisit dhe raportimet e mediave.” – thuhet në reagimin e Albpetrol.
Pra, në vend që të pranojë fajin për derdhjen masive të hidrokarbureve në lumin Vjosë, kompania shtetërore Albpetrol e drejtuar nga Eltar Deda ka zgjedhur të publikojë një deklaratë që i përngjan një shkrim PR e jo një reagim serioz të një kompanie përgjegjësi-marrëse.
Pamjet e publikuara gjerësisht në rrjet nga aktivistët e EcoAlbania dhe RiverWatch tregonin kthimin e lumit në baltë të zezë, derdhje të hidrokarbureve dhe florë e faunë të pajetë përgjatë brigjeve të Vjosës.
Katastrofa mjedisore ka ngritur alarmin ndër qytetarët e shqetësuat për gatin e lumit me pasoja që shkojnë përtej zonës së ndotur. Aktivistët e kanë cilësuar këtë si një “krim të përsëritur ndaj natyrës”, që po zhvillohet në heshtje prej vitesh.
Albpetrol derdh naftën në Vjosë, rrezikohet lumi i fundit i egër në Evropë
