Presidenti amerikan Donald Trump ka bërë një deklaratë të fortë gjatë një konference për shtyp, duke thënë se ka ndërhyrë personalisht për të shmangur një konflikt të mundshëm mes Serbisë dhe Kosovës gjatë mandatit të tij të mëparshëm. Ai tha se i kishte bërë presion Beogradit, duke i paralajmëruar se nëse sulmonin Kosovën, atëherë do të ndalonte çdo marrëdhënie tregtare me Shtetet e Bashkuara të Amerikës.
“Kemi bërë shumë punë. Nuk e di nëse ka ndonjë president që ka punuar më shumë se unë. Serbia dhe Kosova, do të shkonin drejt saj, do të ishte një luftë e madhe. Unë thashë që, nëse ndodh kjo, ju nuk do të bëni tregti me SHBA-në. Dhe ata thanë që, shiko, ndoshta nuk do të shkojmë drejt asaj,” – deklaroi Trump, duke lënë të kuptohet se kërcënimi ekonomik funksionoi dhe parandaloi një konflikt të armatosur.
Trump shtoi se i njëjti model u përdor edhe në tensionet mes Indisë dhe Pakistanit, duke lënë të kuptohet se presioni ekonomik nga SHBA mund të përdoret si mjet për të ruajtur paqen në rajone të tensionuara.
Kjo nuk është hera e parë që Trump përmend Serbinë dhe Kosovën. Vetëm dy ditë më parë ai kishte deklaruar se “Serbia ishte gati të fillonte një përplasje, por ne e përfunduam atë”, pa dhënë më shumë detaje.
Deklaratat e Trump vijnë në një kohë kur raportet Kosovë-Serbi janë ende të tensionuara, dhe ndikimi amerikan në këtë proces vazhdon të jetë kyç.
