Programi bërthamor iranian ka marrë një goditje të rëndë pas sulmeve ajrore të SHBA-së gjatë fundjavës. Drejtori i përgjithshëm i Agjencisë Ndërkombëtare të Energjisë Atomike (IAEA), Rafael Grossi, ka konfirmuar se centrifugat në uzinën bërthamore të Fordow “nuk janë më funksionale”.
Në një deklaratë për Radio France Internationale, Grossi tha se dëmtimet e shkaktuara nga bombardimet janë të mëdha dhe se analizat paraprake janë bërë mbi bazën e imazheve satelitore.
“Duke pasur parasysh fuqinë e këtyre bombave dhe karakteristikat teknike të centrifugave, ne e dimë se ato nuk janë më funksionale, thjesht për shkak të dridhjeve, të cilat shkaktojnë dëme të konsiderueshme fizike”, theksoi ai.
Grossi përshkroi uzinën Fordow si një rrjet tunelesh me struktura të ndryshme dhe konfirmoi se pjesa e goditur i përket sallave të pasurimit të uraniumit.
“Ajo që pamë në fotografi korrespondon pak a shumë me sallën e pasurimit, kjo është ajo që është goditur”, tha ai.
Ky zhvillim vjen në të njëjtën kohë që Irani ka miratuar një projektligj për pezullimin e bashkëpunimit me IAEA-n, në një akt që shihet si kundërpërgjigje ndaj retorikës së Grossit, i cili e ka quajtur “prioritet kryesor” rikthimin e inspektorëve në objektet iraniane pas sulmeve të SHBA-së dhe Izraelit.
