Një reportazh i publikuar nga Radio France Internationale hedh dritë mbi rolin e Shqipërisë në trafikun ndërkombëtar të kokainës, duke e cilësuar vendin si një ndalesë strategjike në rrugën që ndjek droga drejt Evropës. Sipas autorit të reportazhit, gazetarit Louis Seiller, Porti i Durrësit përdoret nga grupet kriminale për të transportuar kokainën që vjen kryesisht nga Amerika Latine, përmes konteinerëve me banane që hyjnë nga Ekuadori.
Droga, sipas tij, pasi hyn në Shqipëri, kalon më tej drejt Kosovës, Serbisë dhe vendeve të tjera të Evropës Qendrore, ndërsa një pjesë e saj dërgohet me tragete drejt Italisë.
Në reportazh theksohet gjithashtu se përpjekjet e autoriteteve për ta luftuar këtë fenomen janë të vështira dhe të rrezikshme, për shkak të fuqisë së rrjeteve të trafikut dhe rrezikut që përbën për zbatuesit e ligjit.
Gazetari ndalet edhe te ndërtimet masive në Tiranë, ku ngritja e dhjetëra kullave luksoze, pavarësisht varfërisë relative të vendit, ka ngritur dyshime për pastrim parash. Ish-ministri i ekonomisë Zef Preçi deklaron për Radio France se shumë nga këto projekte ndërtohen nga kompani me kapital të vogël fillestar, ndërkohë që investimet janë në shifra qindra milionëshe – një tregues i përfshirjes së kapitaleve të dyshimta që vijnë nga aktivitetet e paligjshme.
Në reportazh citohet edhe Fatjona Mejdini nga Iniciativa Globale Kundër Krimit të Organizuar Transnacional, e cila thekson se rrjetet ballkanike janë kthyer në aktorë kryesorë të trafikut të kokainës, duke shfrytëzuar portet e rajonit, mes tyre edhe Durrësin. Ajo shton se sasia e kokainës që kalon nga këto porte është më e vogël se në Evropën Perëndimore, por kontrolli dhe mbikëqyrja janë më të lehta për grupet kriminale.
Lufta kundër krimit të organizuar mbetet një nga kushtet kyçe për procesin e integrimit të Shqipërisë në Bashkimin Evropian. Vetëm në vitin 2021, në Shqipëri, Kosovë dhe Mal të Zi janë sekuestruar mbi 2.5 ton kokainë.
