Me mandatin e fundit në krye të Bashkisë së Korçës, për shkak se ligji ia ndalon rikandidimin, duket se Sotiraq Filo i ka lënë në “harresë” shërbimet ndaj qytetarëve dhe investimet.
Në një prej rrugëve të Korçës, një pusetë prej rreth një viti është ngritur mbi nivelin e asfaltit, por është lënë si monument i paaftësisë dhe neglizhencës bashkiake.
Pamjet që shihni në foton e mëposhtme i përkasin rrugës “Hil Mosi” të lagjes numër 4 të qytetit juglindor, e cila është rikonstrukturuar me fondet nga lekët e taksa-paguesve korçarë, por një pusetë e kanë si një “sukses” urbanistik të rrallë.
Gjatë natës, pa ndriçim dhe pa sinjalistikë, puseta me disa centimetra mbi nivelin e asfaltit kthehet në rrezik për këmbësorët dhe drejtuesit e automjeteve.
Ky aks e ndalon parakalimin, ku shihet se vija është e pandërprerë, por drejtuesit e automjeteve janë të detyruar të kalojnë në korsinë e kundërt për të shmangur pusetën.
Qytetarët thonë për mediat lokale se e kanë denoncuar disa herë si shqetësim, por duket se Bashkia e Korçës e drejtuar nga Sotiraq Filo e ka mendjen tjetër-kund.
