Prokuroria e Posaçme (SPAK) ka dhënë këtë të mërkurë pretencën për ndaj 8 të pandehurve për aferën e sterilizimit, procesi ndaj të cilëve është duke u zhvilluar me gjykim të shkurtuar.
Prokurorët e çështjes, Edvin Kondili dhe Ened Nakuçi kërkuan deklarimin fajtor të ish-zv/ministrit të Shëndetësisë, Klodian Rrjepajt, biznesmenit Ilir Rrapaj dhe gjashtë të pandehurve të tjerë, Marsela Serjani, Saimir Kadiu, Petref Mersini, Arben Gjata, Genc Burazeri dhe Naile Ajazi.
Për ish-zv/ministrin Klodian Rrjepaj dhe biznemsnenin Ilir Rrapaj u kërkua dënimi me nga 10 vjet burgim që në aplikim të gjykimit të shkurtuar reduktohet në 6 vjet e 8 muaj heqje lirie për secilin. Ata janë marrë të pandehur për veprën penale “vjedhje duke shpërdoruar detyrën në kuadër të grupit të strukturuar kriminal”.
Për të njëjtën vepër penale është marrë i pandehur edhe ish-ministri i Shëndetësisë, Ilir Beqaj, por çështja ndaj tij po gjykohet më vete me proces të zakonshëm, pasi ishte kundër gjykimit të shkurtuar.
Ndërkohë, ndaj të pandehurve Saimir Kadiu, Petref Mersini dhe Marsela Serjani u kërkua dënimi me 3 vjet e 6 muaj burg dhe në aplikim të gjykimit të shkurtuar masa me 2 vjet e 4 muaj dhe për Arben Gjatën, Genc Burazerin e Naile Ajazin u kërkua masa e dënimit me 2 vjet që në aplikim të gjykimit të shkurtuar mbetet 1 vit e 4 muaj. Për Mersinin, Gjatën, Burazerin e Ajazin, u kërkua që të vendoset pezullimi i ekzekutimit të dënimit dhe vendosja e tyre në shërbim prove.
SHKELJET
Hetimet gati 3-vjeçare të kryera nga SPAK kanë zbuluar shkelje të ligjit në procedurat e dhënies së njërit prej koncesioneve më të kushtueshme të sektorit të shëndetësisë, me qëllimin e vetëm të shpalljes fitues të kompanisë së Ilir Rrapajt dhe shtetasit Italian, Umbro Staccini. Referuar hetimeve, vlera e koncesionit që llogaritet rreth 100 milionë euro, është fryrë fiktivisht dhe dhjetëra milionë euro. Para që deri më tani, prokuroria nuk e ka zbuluar se në xhepat e kujt kanë shkuar.
Gjithashtu, lista e shkeljeve përmban një studim fizibiliteti me të dhëna të rreme në kundërshtim me ligjin; hartimi i kritereve në mënyrë të tillë që t’u përshtateshin gjendjes reale të kompanive të përzgjedhura paraprakisht si dhe mosveprimin e Beqajt për zgjidhjen e konfliktit të interesit mes Rrjepajt si kryetar i komisionit të koncesionit dhe Rrapajt si përfitues i tij. Shkelje ligjore janë gjetur edhe gjatë negocimit të kontratës koncesionare, që sipas gjyqtarit kanë qenë “dukshëm në favor të kompanisë së shpallur fituese, në dëm të interesave të shtetit”.
Në lidhje me këtë dosje, SPAK lëshoi urdhër-arreste vetëm për Klodjan Rrjepajn dhe Ilir Rrapajn në Gushtin e vitit të kaluar, por Ilir Beqaj u arrestua më vonë. Ai u vu në pranga në fillim të muajit korrik në lidhje me abuzimin me fondet e Bashkimit Europian gjatë kohës që ish-ministri drejtonte Agjencinë Shtetërore të Programimit Strategjik dhe Koordinimit të Ndihmës (SASPAC), për të cilën është marrë po ashtu i pandehur.
SPAK i akuzonte fillimisht Ilir Beqajn vetëm për veprën penale “shpërdorim detyre”, ndërsa Rjepajt dhe Rrapajt dosja kishte akuzën e “mashtrimit me pasoja të rënda në bashkëpunim”.
Gjatë seancës paraprake më 21 janar, bazuar në aktet hetimore, gjyqtarja e GJKKO-së Flojera Davidhi u bëri ftesë prokurorëve që të ndryshonin akuzat për Beqajn, Rrjepajn dhe Rrapajn. Në përfundim, ish-ministri, zëvendësi i tij dhe biznesmeni që fitoi tenderin u morën të pandehur për veprën penale “vjedhje duke shpërdoruar detyrën në kuadër të grupit të strukturuar kriminal”.
