Rastet e adoleshentëve që paraqiten në urgjencën e shërbimit të psikiatrisë janë në rritje, shpesh të nisura me ankth e që përfundojnë në psikoza apo sjellje vetëdëmtuese. Mjekja psikiatre Valbona Alikaj ngre alarmin për këtë situatë, duke theksuar se shumë nga rastet që trajtohen janë pasoja të mosvlerësimit të hershëm të shenjave paralajmëruese.
“Ne mbetemi në shifra që çdo 4 persona vuan nga probleme të shëndetit mendor. Në urgjencë na vijnë shumë raste në rritje me tentativa apo sjellje vetëdëmtuese“, shprehet mjekja.
Sipas saj, një nga faktorët kryesorë që ndikojnë në përkeqësimin e shëndetit mendor tek të rinjtë është ekspozimi i pakontrolluar ndaj ekranit dhe rrjeteve sociale. Adoleshentët shpesh frymëzohen nga modele të dëmshme që shohin në TikTok, të cilat nxisin sjellje të rrezikshme për shëndetin e tyre mendor.
Psikiatrja ndan shqetësimin për dy grupmosha të ndjeshme: foshnjat dhe adoleshentët. Ajo thekson se prindërit nuk duhet të lejojnë përdorimin e pajisjeve teknologjike pa mbikëqyrje, madje sugjeron që deri në moshën 16 vjeç, dhe në raste të veçanta deri në 18 vjeç, fëmijët të jenë nën kontroll të plotë.
“Edhe foshnja jo t’i lihet telefoni e të shikojë vetë. Dhe adoleshentët minimumi deri në 16 vjeç e maksimalja 18 vjeç të jenë të kontrolluar nga prindërit”, thotë Alikaj, duke shtuar se fëmijët shpesh janë disa hapa para prindërve në njohjen e teknologjisë, çka e bën edhe më të vështirë monitorimin.
Megjithatë, ajo thekson se rrjetet sociale mund të kenë edhe përfitime në zhvillimin personal të të rinjve, por është thelbësore që përdorimi i tyre të jetë i balancuar dhe i mbikëqyrur.
Psikiatria u bën thirrje prindërve të jenë më të vëmendshëm ndaj ndryshimeve të sjelljes tek fëmijët, pasi shpesh ato janë një thirrje për ndihmë që nuk duhet neglizhuar./Top Channel
