Irani ka konfirmuar të mërkurën se gjeneralmajori Ali Shadmani, komandant i Shtabit Qendror Khatam al-Anbiya, ka ndërruar jetë si pasojë e lëndimeve të marra gjatë sulmeve izraelite javën e kaluar.
Shadmani mori detyrën më 13 qershor, pas vdekjes së paraardhësit të tij, gjenerallejtënant Gholam Ali Rashid, i cili gjithashtu humbi jetën në një nga sulmet e para të Izraelit ndaj Iranit.
Shtabi Khatam al-Anbiya është një strukturë kyçe që koordinon forcat e ushtrisë së rregullt dhe Gardës Revolucionare Islamike të Iranit.
Sulmet izraelite ndaj Iranit nisën më 13 qershor, me arsyetimin se synonin të parandalonin zhvillimin e një arme bërthamore nga Republika Islamike. Për 12 ditë radhazi, të dyja vendet shkëmbyen sulme, duke e përshkallëzuar konfliktin në nivel rajonal.
Të dielën, Shtetet e Bashkuara ndërhynë duke goditur tri objekte bërthamore në Iran, për të cilat pretenduan se përbënin thelbin e programit bërthamor iranian. Sipas autoriteteve amerikane, objektivat janë shkatërruar plotësisht.
Ndërkohë, përpara fillimit të ofensivës ushtarake nga Izraeli, SHBA-ja dhe Irani kishin zhvilluar pesë raunde bisedimesh mbi programin bërthamor të Teheranit, por ato u ndërprenë për shkak të përshkallëzimit të tensioneve.
