Pas takimit të fundit të NATO-s, Bashkimi Europian pritet të mbajë një samit dy-ditor më 26 dhe 27 qershor në Bruksel, ku liderët e vendeve anëtare do të diskutojnë dhe miratojnë një rezolutë të re që synon rritjen e presionit mbi Rusinë. Drafti i zbardhur i dokumentit bën thirrje për armëpushim të menjëhershëm dhe paralajmëron një paketë të re sanksionesh.
Në tekstin e rezolutës thuhet se “Këshilli Evropian dënon fuqimisht bombardimet e vazhdueshme të civilëve dhe infrastrukturës civile nga Rusia dhe bën thirrje për një armëpushim të plotë, të pakushtëzuar dhe të menjëhershëm”. BE përshëndet gatishmërinë e Ukrainës për një paqe të menjëhershme dhe kërkon që Rusia të tregojë vullnet të sinqertë politik për t’i dhënë fund luftës.
Në vijim, dokumenti nënvizon se BE është e gatshme të shtojë presionin ndaj Kremlinit përmes një “pakete të re dhe të fuqishme sanksionesh”.
Një tjetër pikë e rëndësishme në rezolutë është domosdoshmëria për “garanci të forta dhe të besueshme sigurie për Ukrainën” që do të shoqërojnë një marrëveshje gjithëpërfshirëse paqeje për të parandaluar agresione të mëtejshme nga Rusia.
Mbështetja për integrimin europian të Ukrainës është gjithashtu e qartë në draft, i cili i bën thirrje Këshillit të BE të ndërmarrë hapat e radhës në procesin e pranimit të Ukrainës, bazuar në përmbushjen e kritereve të vendosura.
Megjithatë, mbështetja për këtë rezolutë nuk është unanime. Sipas burimeve diplomatike, Hungaria pritet të mos e mbështesë tekstin për shkak të qëndrimit të saj kritik ndaj avancimit të Ukrainës drejt anëtarësimit në BE. Kryeministri hungarez Viktor Orban pritet të përdorë këtë samit për të paraqitur rezultatet e një konsultimi kombëtar jo-detyrues të zhvilluar së fundmi në vendin e tij.
Samiti i BE-së shihet si një hap kyç për qëndrimin e bllokut europian ndaj luftës në Ukrainë dhe për përcaktimin e strategjisë së ardhshme politike dhe ekonomike kundër Rusisë.
