Gjykata e Posaçme kundër Korrupsionit dhe Krimit të Organizuar ka dhënë vendimin përfundimtar për katër ish-zyrtarë të pushtetit vendor në Kurbin, të akuzuar për shkelje të barazisë në tendera publikë dhe falsifikim dokumentesh.
Jeton Cakoni, Vlash Gega dhe Donika Senka janë shpallur fajtorë, ndërsa Irisi Tahiraj është shpallur e pafajshme.
Jeton Cakoni është dënuar me 1 vit burg, i reduktuar në 8 muaj për shkak të gjykimit të shkurtuar. Gjykata vendosi pezullimin e dënimit dhe vendosjen e tij në provë për 16 muaj. Po ashtu, ai humbet të drejtën për të ushtruar funksione publike për një periudhë 5-vjeçare.
Vlash Gega u dënua me të njëjtën masë 1 vit burg, i reduktuar në 8 muaj, me pezullim të dënimit dhe vendosje në provë për 16 muaj. Edhe ai nuk do të mund të ushtrojë funksione publike për 5 vite.
Donika Senka u shpall fajtore për veprën penale të falsifikimit të vulave, stampave dhe formularëve në më shumë se një rast. Edhe për të u vendos një dënim prej 1 viti, i reduktuar në 8 muaj, i pezulluar dhe me provë për 16 muaj.
Ndërkohë, Irisi Tahiraj u shpall e pafajshme. Sipas vendimit të gjykatës, nuk u gjetën prova që të vërtetonin përfshirjen e saj në shkeljet e pretenduara.
