Instituti i Shëndetit Publik ka deklaruar se aktualisht nuk ekziston asnjë rrezik për rrezatim në Shqipëri pas zhvillimeve të fundit në Iran.
Eksperti për mbrojtjen nga rrezatimi, Dr. Rustem Paci, u shpreh se vendi ynë është në monitorim të vazhdueshëm dhe nuk ka asnjë shenjë për rritje të nivelit të radioaktivitetit.
“Deri më tani nuk ka të dhëna për nivel të rritur të rrezatimit as atje. Shqipëria ka 10 pika monitorimi që sinjalizojnë çdo 10 minuta nëse ka rritje të nivelit të radioaktivitetit”, tha Paci.
Ai sqaroi se Shqipëria ka një plan të miratuar për përballimin e emergjencave radiologjike, i cili parashikon veprime të koordinuara në rast se regjistrohen nivele të rrezatimit që kërkojnë reagim.
“Ky plan përcakton se si të mbrohemi, ku të shkojmë, sa të qëndrojmë. Aktivizohen menjëherë skuadrat e emergjencës nëse sinjalizohet ndonjë rrezik”, shtoi ai. /TopChannel
