Ndërsa në Pentagon po zhvillohej një takim informues mbi situatën në Lindjen e Mesme, zëvendëspresidenti amerikan JD Vance deklaroi në një intervistë për NBC News se Shtetet e Bashkuara nuk janë në luftë me Iranin, por me ambiciet e tij bërthamore.
“Ne besojmë se kemi shkatërruar programin bërthamor të Iranit,” u shpreh Vance, duke konfirmuar qëllimin strategjik të operacionit të ndërmarrë ndaj tre objekteve bërthamore iraniane.
Zëvendëspresidenti gjithashtu reagoi ndaj kritikave të ngritura nga udhëheqësi demokrat i Dhomës së Përfaqësuesve, Hakeem Jeffries, i cili kishte vënë në dyshim autoritetin presidencial për ndërmarrjen e sulmit. Vance e cilësoi këtë pretendim si të pavërtetë dhe theksoi se operacioni ishte brenda kompetencave të presidentit Trump.
Ai shtoi se SHBA-të dhe aleatët do të punojnë për të çmontuar përfundimisht programin bërthamor të Iranit, duke nënvizuar se qëllimi është parandalimi i çdo kërcënimi që mund të vijë nga Teherani në të ardhmen.
