Influencuesja Claudia Bavel është shfaqur sërish publikisht për të sqaruar thashethemet e përhapura gjatë ditëve të fundit në lidhje me afrimitetin e supozuar të saj me futbollistin e Barcelonës, Lamine Yamal.
Gjatë një interviste ekskluzive në programin “TardeAR”, Bavel ka hedhur poshtë me vendosmëri versionin e futbollistit të ri dhe ka treguar versionin e saj për ngjarjen.
Sipas influenceres, ka qenë vetë Yamal ai që e kontaktoi fillimisht më 8 shtator 2024 përmes WhatsApp, duke përdorur një ndërmjetës të përbashkët.
Sipas Bavel, futbollisti i kishte propozuar të merrte pjesë në takime apo festa të organizuara prej tij, madje edhe kur ai ishte ende i mitur. Po kështu i kishte dërguar disa mesazhe dhe audio ku i thoshte “se e autorizonte të ishte me të, edhe pse ishte i mitur”.
Pavarësisht këtyre këmbënguljeve, Bavel siguron se nuk pranoi kurrë asnjë takim: “Nuk u takuam kurrë, sepse nuk doja të takoja një të mitur”. Për më tepër, influencerja deklaron se ruan “një grumbull audio-mesazhesh prej tij, ku më thoshte të shkoja atje ku jetonte” dhe se e kishte refuzuar ftesën për arsye etike e ligjore.
Ajo denoncoi gjithashtu se futbollisti i kishte dërguar së fundmi një mesazh me tone kërcënuese, duke i kërkuar të mos tregonte asnjë detaj mbi marrëdhënien e saj me të: “Më shkroi para pak kohësh duke më kërcënuar që të mos tregoja asgjë që kishte lidhje me të”.
Bavel thekson kështu se ka një mospërputhje të madhe mes versioneve të të dyve. Ajo mbron idenë se ishte Yamal, ai që nisi kontaktin dhe se disponon prova (mesazhe dhe audio) për këtë, ndërsa Yamal ka përsëritur në të njëjtin program se “nuk jemi takuar kurrë”, “as që e kam parë ndonjëherë”, madje ka shtuar se në shtëpinë e tij “nuk lejohet hyrja e femrave” sipas rregullit të vendosur nga nëna e tij.
