Kompanitë në mbarë botën po hyjnë me shpejtësi në tregun e Bitcoin, edhe pse shumica e tyre nuk kanë lidhje të drejtpërdrejtë me botën e kriptomonedhave. Ato po ndjekin një strategji që deri tani ka sjellë rritje të jashtëzakonshme në çmimet e aksioneve: blejnë Bitcoin dhe e mbajnë si pasuri në bilancet e tyre.
Gjatë vitit të fundit, numri i kompanive që mbajnë Bitcoin është rritur me afro 170%. Sipas të dhënave nga BitcoinTreasuries.net, rreth 130 kompani të listuara në bursë zotërojnë aktualisht Bitcoin me vlerë rreth 87 miliardë dollarë, ose 3.2% të totalit që do të ekzistojë ndonjëherë.
Miliarderi Michael Saylor, i cili e ktheu kompaninë MicroStrategy në një “makinë të blerjes së Bitcoin”. Vlera e tregut e kësaj kompanie sot është 100 miliardë dollarë, më shumë sesa vlera e vetë Bitcoin-it që ajo mban.
Modeli i tij është ndjekur tashmë nga kompani në SHBA, Japoni, Francë dhe së fundmi edhe nga kompania mediatike e familjes Trump, që kërkon të përfitojë nga premtimi i Donald Trump për ta bërë SHBA-në “kryeqendër globale të kriptos”.
Disa kompani shesin aksione apo marrin borxhe për të blerë Bitcoin, të tjera e mbajnë thjesht si pjesë të strategjisë financiare, duke pasur edhe aktivitete të tjera parësore. Për shumë prej tyre, vlera në treg është shumë më e lartë se vlera reale e kriptomonedhës që zotërojnë, një besim nga investitorët se këto kompani mund të vazhdojnë të mbledhin para dhe të blejnë më shumë Bitcoin, duke ngritur çmimin e aksioneve dhe duke hyrë në një cikël që disa e quajnë “defekti i parave pa fund”.
Por kjo strategji nuk është testuar ende në një krizë të zgjatur të çmimit të Bitcoin.
Nëse ndodh një rënie e madhe dhe afatgjatë, kompanitë që kanë marrë borxh për të blerë Bitcoin mund të përballen me vështirësi.
Ndërkohë, emrat e mëdhenj që po futen në këtë valë janë shumë: kompania Twenty One, e mbështetur nga Tether dhe SoftBank, pritet të nisë me 42,000 Bitcoin. Tesla është rikthyer sërish si mbajtës i rëndësishëm, pasi më parë kishte shitur pjesën më të madhe të kriptomonedhave që bleu në vitin 2021. Block, kompania e Jack Dorsey-t, po investon rregullisht 10% të fitimeve mujore nga produktet e Bitcoin.
Në Japoni, Metaplanet, dikur një kompani ndërtimi hotelesh është kthyer plotësisht në një kompani “Bitcoin-first”, me synimin për të zotëruar 210,000 Bitcoin deri në vitin 2027.
Kjo garë globale për të grumbulluar Bitcoin po ndez jo vetëm bursat, por edhe një debat mbi stabilitetin financiar të këtyre kompanive. A do t’i shpërblejë tregu për guximin e tyre apo do t’i ndëshkojë në rast se kriptomonedhat bien nga froni?
Në çdo rast, revolucioni i “arkës me Bitcoin” ka nisur dhe, për momentin, duket se askush nuk dëshiron të mbetet pas.
