Policia e Lezhës ka reaguar lidhur me pamjet që u bënë virale ditën e sotme në media, ku një automjet me efektivë Policie kaloi pranë dhe qetë qetë një aksidenti dhe nuk ndaluan për t’u interesuar mbi të aksidentuarin.
Sipas bluve të Lezhës, në ato momentet efektivët kanë qenë duke shoqëruar një shtetas të paraburgosur, me masë sigurie “arrest në burg”, drejt burgut të Shënkollit dhe se
Autoritetet policore thonë se ndalimi i mjetit të shërbimit gjatë transportit të personave të arrestuar nuk lejohet për arsye sigurie, përveç rasteve kur ndalohet në ambientet e burgut ose në strukturat përkatëse të Policisë, siç parashikohet nga legjislacioni në fuqi.
Kujtojmë se këtë të premte, në aksin rrugor “Milot–Lezhë”, në afërsi të zonës së njohur si “Ishulli Lezhë”, një automjet tip “Mercedes Benz”, ngjyrë e zezë, teksa po tentonte të kthehej nga e djathta në të majtë të rrugës, përplasi një motor. Si pasojë e aksidentit ka mbetur i plagosur drejtuesi i motorit, ku siç shihet edhe në videon e mëposhtme, kalimtarë të rastësishëm dhe vetë drejtuesi i makinës ndaluan për t’i dhënë ndihmën e parë.
Por, teksa ndalojnë qytetarët, të njëjtën gjë nuk e bën Polici. Një makinë policie, që ndodhej shumë pranë vendit të ngjarjes, kaloi ngadalë fare afër personit të shtrirë në rrugë, pa ndaluar dhe pa marrë asnjë masë për të verifikuar çfarë kishte ndodhur.
Autoritetet policore thonë se drejtuesi motorit që mbeti i plagosur, shtetasi E. K., është transportuar drejt spitalit të Traumës në Tiranë për ndihmë mjekësore më të specializuar dhe ndodhet jashtë rrezikut për jetën.
KOMUNIKATA E POLICISË SË LEZHËS
Sqarim i Drejtorisë Vendore të Policisë Lezhë
Në lidhje me një video të publikuar në rrjetet sociale, ku shfaqet një automjet policie që kalon pranë një aksidenti rrugor pa ndaluar, në funksion të informimit të saktë të opinionit publik, sqarojmë se:
Automjeti i Policisë që shfaqet në video është i Patrullës së Përgjithshme të Komisariatit të Policisë Lezhë, i cili ishte në përmbushje të një detyre zyrtare, duke shoqëruar një shtetas të paraburgosur, me masë sigurie “arrest në burg”, drejt Institucionit të Ekzekutimit të Vendimeve Penale në Shënkoll, Lezhë.
Sipas përcaktimeve të “Manualit për trajtimin e personave të shoqëruar, ndaluar dhe arrestuar në ambientet e Policisë”, ndalimi i mjetit të shërbimit gjatë transportit të personave të arrestuar nuk lejohet për arsye sigurie, përveç rasteve kur ndalohet në ambientet e burgut ose në strukturat përkatëse të Policisë, siç parashikohet nga legjislacioni në fuqi.
Përsa i përket aksidentit rrugor, sqarojmë se në vendin e ngjarjes kanë shkuar shërbimet e Policisë Rrugore, të cilat janë njoftuar nga Patrulla e Përgjithshme që po transportonte të paraburgosurin drejt IEVP Shënkoll, Lezhë.
Gjithashtu, sqarojmë se drejtuesi i motomjetit, shtetasi E. K., i dëmtuar gjatë aksidentit rrugor të ndodhur në aksin rrugor “Milot–Lezhë”, në afërsi të zonës së njohur si “Ishulli Lezhë”, u transportua në Spitalin e Traumës, në Tiranë, për ndihmë mjekësore më të specializuar dhe ndodhet jashtë rrezikut për jetën.
Drejtoria Vendore e Policisë Lezhë garanton opinionin publik se vepron me transparencë, përgjegjësi dhe profesionalizëm, në funksion të zbatimit të ligjit dhe ofrimit të një shërbimi cilësor për qytetarët.
VIDEO/ Skandal në Lezhë, Policia kalon pranë të aksidentuarit dhe nuk ndalon
