Ardit Deliu u largua pas vetëm një viti në radhët e Vllaznisë në fund të këtij sezoni. Por ai nuk ka vonuar shumë që të gjejë një ekip tjetër. Mesfushori është zyrtarizuar sot në radhët e Ballkanit në Kosovë, duke u vënë përsëri nën urdhrat e trajnerit Orges Shehi.
Tekniku drejtoi Deliun në vitin e tij të fundit në radhët e Tiranës dhe mesfushori ka pranuar ftesën për t’iu bashkuar atje disa emrave të tjerë të njohur me të kaluar në kampionatin shqiptar që janë bërë pjesë e Ballkanit në këto vite.
“Klubi ynë ka kënaqësinë të njoftojë përforcimin më të ri në mesfushë Ardit Deliu, një lojtar me përvojë dhe cilësi të dëshmuara në elitën e futbollit shqiptar dhe ndërkombëtar.
Mesfushori 26-vjeçar vjen tek ne pas një sezoni të suksesshëm me KF Vllaznia Shkodër, ku tregoi vlerat e tij si një lider në mesfushë, me disiplinë taktike dhe shpirt gare të jashtëzakonshëm.
Mirë se vjen në Suharekë Ardit, të dëshirojmë shumë suksese me fanellën tonë! Le ta shkruajmë bashkë kapitullin e radhës!”, shkruhej në njoftimin e klubit për marrëveshjen me mesfushorin.
