Victor Osimhen mbetet një nga protagonistët kryesorë të merkatos së verës. Sulmuesi nigerian, në pronësi të Napolit, por i huazuar te Galatasaray, vazhdon të jetë në qendër të vëmendjes së klubeve të mëdha europiane dhe jo vetëm.
Deri tani, ai ka refuzuar ofertat milionëshe që kanë ardhur nga Arabia Saudite, në veçanti nga Al Hilal i Inzaghit, klub i gatshëm të ofronte 75 milionë eurot e parashikuara nga klauzola e largimit e vendosur nga De Laurentiis.
Megjithatë, sipas asaj që raporton “Mediaset”, Liverpool-i, kampioni i ri i Anglisë, është gati të futet seriozisht në “ankandin” për Osimhen. “Reds” po studiojnë një ofertë që parashikon përfshirjen e dy lojtarëve të nivelit më të lartë për të ulur, nëse jo për ta zhdukur plotësisht, shumën e klauzolës së nigerianit.
Në tryezë janë kartonët e Darwin Nunez, i lidhur prej javësh me Napolin, dhe Federico Chiesa, profil shumë i pëlqyer nga drejtuesit napolitanë.
Një ofertë që Napoli po e vlerëson me kujdes. Prioriteti i klubit blu mbetet shitja jashtë Italisë, nuk është sekret që Osimhen prej kohësh i pëlqen Juventusit, edhe pas ndarjes me Giuntolin, por ky shkëmbim i dyfishtë përbën një bazë konkrete për të diskutuar.
Gjithsesi, napolitanët do të donin edhe një pjesë të mirë ekonomike për t’u afruar më shumë me vlerën e plotë të operacionit. Loja sapo ka filluar, por lëvizja e Liverpool-it e ka ndryshuar tashmë “ankandin” në fjalë.
