Flamur Ruçi është afrimi i radhës tek Egnatia në këtë merkato vere. Klubi rrogozhinas ka vendosur të blejë kartonin e lojtarit te Bylis.
Ruçi ishte pjesë e ballshiotëve prej pesë sezonesh, ndërsa tani do të provojë një aventurë të re në kampionatin shqiptar.
Futbollisti beratas kishte edhe dy vite në kontratë me Bylisin, por Egnatia vendosi të paguajë për kartonin e tij, për ta afruar në ekip.
Lajmi për transferimin e Ruçit tek Egnatia është konfirmuar nga klubi i Bylisit.
“FK Bylis njofton arritjen e marrëveshjes, për transferimin e mesfushorit Flamur Ruçi te kampionët e Egnatias. Pas pesë viteve kontribut në klubin tonë, një vit aktivizim me moshat dhe katër vite në ekipin e parë, Ruçi sot nis një eksperiencë të re. Beratasi kishte edhe dy vite kontratë me skuadrën tonë.
FK Bylis e falënderon për kontributin e dhënë dhe i uron suksese në vijimin e karrierës së tij”, shkruan klubi ballshiot.
