Forcat ajrore të Izraelit kanë shkatërruar selinë e sigurisë së brendshme të Iranit, sipas ministrit të mbrojtjes së Izraelit, Israel Katz, i cili konfirmoi se goditja u krye nga avionët luftarakë izraelitë në kuadër të një operacioni të vazhdueshëm kundër objektivave iraniane.
“Uragani vazhdon të godasë Teheranin,” tha Katz, duke shtuar se “avionët e Forcës Ajrore shkatërruan selinë e Sigurisë së Brendshme – organi kryesor shtypës i regjimit iranian”.
Katz theksoi gjithashtu se Izraeli do të vazhdojë të godasë “simbolet e pushtetit” dhe të sulmojë regjimin e ajatollahëve “kudo që ndodhet”. Pavarësisht mungesës së detajeve të mëtejshme për vendndodhjen dhe shkallën e dëmeve, kjo deklaratë shërben si pjesë e përshkallëzimit të tensioneve dhe sulmeve izraelite ndaj Iranit.
Më herët gjatë ditës, ushtria izraelite njoftoi nisjen e një valë të re sulmesh ajrore kundër objektivave ushtarake në Teheran, në ditën e gjashtë të konfliktit ushtarak mes dy vendeve. “Forca Ajrore izraelite po godet objektiva ushtarake të regjimit iranian në Teheran,” tha ushtria rreth orës 16:00 sipas orës lokale.
