Gjykata e Tiranës ka dënuar me burgim të përjetshëm Bledar Jambellin dhe Kristaq Lecin për vrasjen e ish-drejtorit të policisë se Vlorës Artan Cuku. Ky i fundit, u ekzekutua më 8 prill të 2017-ës, për shkak të detyrës. Ndërsa Bledar Jambelli u arrestua në Greqi në vitin 2018, si organizator dhe financues i krimit. Edhe Kristaq Leci u arrestua në Athinë, si bashkëautor.
Sipas vendimit të dhënë nga gjyqtari Gerd Hoxha, të dy të pandehurit u shpallën fajtorë për “vrasje të punonjësve të Policisë së Shtetit” dhe “mbajtje pa leje të armëve dhe municioneve”.
Për të realizuar planin, Jambelli bashkëpunoi me Kristaq Lecin dhe Mikel Shallarin, ky i fundit autori i ekzekutimit. Motivi i vrasjes së Çukut ishte arrestimi që ish-kryekomisari Cuku i ka bërë porositësit Bledar Jambelli në vitin 2012, të akuzuar për vrasjen e Armando Delajt po atë vit, për të cilën, Jambelli u lirua dy vite më pas nga gjykata, madje mori edhe mbi 500 mijë lekë dëmshpërblim nga shtetit për ditët e burgut.
