Mahamadou Dembele pritet të shitet në një skuadër tjetër dhe zor se mund të luajë me Tiranën në sezonin e ri. Ashtu siç e ka paralajmëruar më parë gazeta, futbollisti do të ndërrojë fanellë këtë verë.
Së fundmi, ka dalë në lojë, një ofertë nga Arabia Saudite. Emri i skuadrës nuk bëhet i ditur, por arabët japin 200 mijë euro, ndërsa vetë Tirana kërkon të paktën 300 mijë euro.
Për t’u parë mbetet, nëse oferta nga ana e arabëve do të rritet apo jo. Nëse marrëveshja nuk mbyllet shpejt atëherë, destinacioni pritet të jetë një nga vendet nordike ose në Rumani. Kujtojmë që Dembele është një mbrojtësit kryesorë të skuadrës, ndërsa ai gjatë gjithë kohës ka pasur oferta nga skuadra të tjera.
Në janar, shitja u anulua pasi klubi nuk pranoi çmimin që iu propozua nga dy skuadra, njëra turke e tjetra austriake. E njëjta situatë është edhe për Zharmuninë. Futbollisti ka pasur oferta nga kampionati turk dhe Tirana nuk dëshiron që të humbasë sulmuesin pa bërë një sezon me bardheblutë.
Vlera e Jarmounit është 450 mijë euro, ndërsa ajo e Dembelesë 300 mijë euro. Tirana kërkon që të marrë të paktën 600- 700 mijë euro nga ky operacion (shitja e Dembelesë dhe Zharmunit), ndërsa ende nuk ka caktuar një çmim të paktën për Zharmuninë, që pëlqehet nga disa klube dhe duan të dinë vlerën e kartonit dhe janë interesuar te bardheblutë.
Edhe situata e Ermal Metës do të vlerësohet. Në verë u bllokua nga Tirana, për t’u shitur në Ukrainë, pasi skuadra bardheblu kërkonte më shumë para nga ekipi i huaj.
Edison Kola vazhdon të jetë në qendër të vëmendjes së merkatos në dalje të Tiranës. Lojtari është kërkuar para pak kohësh nga skuadra e Helsinkit. Finlandezët ofruan rreth 250 mijë euro për të marrë shërbimet e mbrojtësit të Tiranës. /Panoramasport
