Një video e re nga një kënd tjetër që tregon aeroplanin e ‘Air India’ duke u ngritur nga pista e aeroportit të Ahmedabadit dhe duke u përplasur në një konvikt studentësh mjekësie po qarkullon në mediat sociale.
Videoja, e kapur nga një kamera e aeroportit, tregon aeroplanin me 242 persona në bord duke arritur një lartësi prej rreth 190 metrash përpara se të zbresë gradualisht drejt tokës.
Avioni i Air India kishte për destinacion aeroportin Gatwick, në Londër, por rrugëtimi i mbi 240 pasagjerëve përfundoi rreth 40 sekonda pas ngritjes nga pista.
Vetëm pak sekonda pasi avioni është ngritur në ajër nga aeroporti në shtetin veriperëndimor indian të Gujaratit, mund të shihet duke u përpjekur për të fituar lartësi dhe në vend të kësaj fillon të zbresë drejt ndërtesave, me rrotat ende jashtë dhe hundën e ngritur.
Një shpërthim i madh dhe re të dendura tymi të zeza mund të shihen duke u ngritur në qiell pas përplasjes.
