Freskia fizike dhe aktivizimi i lojtarëve të caktuar ndikoi në barazimin ndaj Letonisë për kualifikueset e Kupës së Botës 2026.
Ish-futbollisti i Kombëtares, Mirel Josa, mendon se në sulm mund të ishin aktivizuar edhe futbollistë të tjerë prej minutës së parë.
“Nuk duhet të kishte filluar me të njëjtën treshe sulmuese. Mund të kishte ndonjë kombinim tjetër duke vendosur Brojën në qendër, Asanin në krahë, Bajramin apo Muçin në krahun tjetër”.
Për Mirel Josën duhej edhe një ekulibër më i mirë mes sulmit dhe mbrojtjes, ndërsa u habit nga aktivizimi i Manajt. “Nuk e prisja që Manaj do fillonte, me atë gjendje që kishte” tha ai.
Pavarësisht barazimit zhgenjyes në Riga, Josa mendon se shpresat për kualifikimin në Botëror nuk janë shuar, por duhet pritur se si do të jetë gjendja e ekipit në takimet e tjera.
“Nuk do të thotë meqë nuk u arrit maksimumi në ndeshjen e djeshme edhe çdo gjë ka marrë fund, derisa ke shpresa matematikisht, varet me në cilën mënyrë do të presësh ndeshjet e tjera, varet nga gjendja sportive e lojtarëve”.
Shqipëria ka zhvilluar gjysmën e ndeshjeve deri më tani dhe prej tyre ka marrë vetëm 5 nga 12 pikët e mundshme.
