Një kapitull i rëndësishëm në karrierën e César Azpilicueta-s po mbyllet.
Mbrojtësi i njohur spanjoll ka njoftuar se pas përfundimit të Kupës së Botës për Klube, ai do të largohet nga Atletico Madridi, duke i dhënë fund aventurës së tij me klubin kryeqytetas.
Në një konferencë për shtypin të mbajtur sot, Azpilicueta u shpreh me emocion:
“Shpresoj që kjo ndarje të përmbyllet me sukses. Të largohem me një trofe do të ishte mënyra më e lumtur për ta mbyllur.”
35-vjeçari, që iu bashkua Atleticos në vitin 2023 pas shumë vitesh me suksese te Chelsea, ka qenë një figurë e rëndësishme në dhomën e zhveshjes dhe një shembull profesionalizmi në fushë.
Me përvojën dhe lidershipin e tij, ai mbetet një nga lojtarët më të respektuar të brezit të tij.
Azpilicueta nuk e ka konfirmuar ende nëse do të tërhiqet përfundimisht nga futbolli pas këtij turneu, por gjithçka tregon se Botërori për Klube mund të jetë akti i fundit i një karriere të ndritur. Tifozët e Atleticos shpresojnë ta përshëndesin me një trofe në dorë.
