Ish-sulmuesi i Kombëtares shqiptare, Roland Luçi, ka komentuar barazimin e kuqezinjve ndaj Letonisë si një ndeshje ku ekipi nuk shfaqi cilësi.
Nëpërmjet rrjeteve sociale, Luçi ka kritikuar paraqitjen e kuqezinjve, por edhe zgjedhjet e Silvinjos, me një ekip i cili sipas tij nuk ka forcë të gjejë rrjetën ndaj askujt përveç Andorrës.
Postimi i Luçit:
Përballje e shpëlarë, kurrfarë cilësie, zhgënjim për iluzionistët dhe ëndërrimtarët.
Vlera e gjithë ekipit letonez sipas Transfermarkt diku sa gjysma e çerekut të Asllanit, e megjithatë gjuajti më shumë në portë se ekipi i Silvinjos, humbi dhe një penallti.
Me që ra llafi te ky Silvinjo, zotnia fut në loje Hysajn kur gjithë shqiptarët nuk e duan, dhe kur gjithë shqiptarët e duan, ai nuk e aktivizon!
Shpresa vdes e fundit dhe patjetër që shpresojmë për ndeshjen e ardhshme me Andorrën se cilës mund t’i shënojmë, se kujt tjetër zor, duke marrë për referim katër ndeshjet e deritanishme.
Mbas dështimit të sotëm të paktën nuk do të shohim krekosje gjelash në pleh me epshin e përhershëm që të përvetësojnë “suksesin”.
