Sali Berisha gjatë një konference me gazetarët ka nxjerrë nga “iPad-i” i tij edhe një meme të Elisa Spiropalit.
“Sa isha e vogël, mendoja se demokracia ishte të çoja vetëm dy gishtat lart. Por për t’ia pa hajrin, kur u rrita fillova të çoj edhe këmbët” – shkruhej në fotomontazhin, ku kryeparlamentarja shfaqej në foto duke folur në Kuvend.
Berisha tha se ai fotomontazh është ilustrimi më i përsosur i metamorfozës, pasi sipas tij, Spiropali, u bë Spirogjoka, duke iu referuar dosjes ku është marrë i pandehur biznesmeni Pëllumb Gjoka. Lideri demokrat tha se në konferencën e radhës do sjellë edhe metamorfozën e Lubisë, duke iu referuar Belinda Ballukut.
“Është vetëm fillimi. Këta kriminelë elektorale do ta paguajnë atë që u bënë shqiptarët. Dhe ata dy janë eksponentë madhorë të krimit elektoral dhe joelektoral. Unë u sugjeroj. Mos ua fshihni shqiptarëve. Prisni pak…. kjo është nga libraria ime dixhitale. Se do u bëj një pyetje unë ju. Ju lutem, tani keni dëgjuar ju për dosjen Metamorfoza? E kuptoni ju mirë. Dosja Metamorfoza i kushtohet Pëllumb Gjokës.
Kurse Pëllumbesha Spirogjokën nuk e përmend kush. Tani kam unë këtu një video dhe më thoni ju, është kjo videoja më klasike e Metamorfozës apo jo? Ishte Spiropali, u bë Spirogjoka në fund. Është kjo apo jo? Ju lutem, jepjani publikut këtë. A është metamorfozë kjo apo jo? Unë po flas për metamorfozë të plotë. Ju lutem, pse t’i biesh në qafë Pëllumbit dhe të mos i biesh në qafë Pëllumbeshës? Pse t’i thuash metamorfozë Pëllumbit dhe të mos i thuash Pëllumbeshës metamorfozë? Ja pra zonja Maloku se cila është metamorfoza e vërtetë! Ky është ilustrimi më i përsosur i metamorfozës. Do sjell edhe metamorfozën e Lubisë, por njëherë e kemi me këtë. Se këto janë në rivalitet tani se cila do sulmojë më shumë Berishën që të zërë një pozicion. Do zënë këto atë që meritojnë. Kjo është përgjigjja ime për fjalimin që ka mbajtur, meqenëse nuk isha se do ia shfaqja në parlament.” – tha Sali Berisha.
