Presidenti amerikan Donald Trump, urdhëroi vendosjen e 2000 pjesëtarëve të Gardës Kombëtare në Los Anxhelos, pas shpërthimit të trazirave gjatë protestave kundër arrestimeve dhe dëbimeve masive të emigrantëve të parregullt.
Zëdhënësja e Shtëpisë së Bardhë, Caroline Leavitt, kritikoi ashpër autoritetet e Kalifornisë, duke i quajtur “të paafta”.
Guvernatori demokrat i Kalifornisë, Gavin Newsom, e cilësoi vendimin si “qëllimisht provokues”.
Më shumë se 40 persona u arrestuan të shtunën në Los Anxhelos për kundërshtim ndaj agjentëve të Shërbimit të Imigracionit dhe Doganave të SHBA (ICE), të cilët prej javësh kanë nisur një operacion mbarëkombëtar për kapjen e emigrantëve të parregullt, me urdhër të Presidentit Trump.
“Në disa raste janë kryer arrestime për pengim të operacioneve tona”, shkroi zëvendësdrejtori i FBI-së, Dan Bongino, në platformën X. “Do të ketë edhe shumë të tjera. Po analizojmë pamjet filmike për të identifikuar autorët. Ju sillni kaos, ne sjellim prangat”, shtoi ai.
Trupa të ICE u mblodhën në mëngjes në lagjen Paramount, një zonë me shumë banorë të komunitetit latino, pranë një dyqani të zinxhirit Home Depot, ku zakonisht punëtorë të pa specializuar presin të gjejnë punë ditore. Nuk është e qartë nëse agjentët ishin aty për arrestime apo për përgatitje operative.
Prania e tyre shkaktoi tensione, dhe zyra e sherifit njoftoi se vendosi forca policore për të rivendosur rendin. Protestuesit hodhën sende ndaj policisë dhe tentuan të ndalonin largimin e një autobusi nga zona. Policia i shpërndau turmat duke përdorur gaz lotsjellës dhe granata ndriçuese.
Disa orë më vonë, rrugët u mbushën me mbeturina dhe karroca të përmbysura, siç treguan pamjet televizive. Po ashtu, disa protestues dogjën një flamur amerikan.
Ndërkohë, Sekretari amerikan i Mbrojtjes, Pete Hegseth, paralajmëroi se Pentagoni është gati të mobilizojë marinsat nëse dhuna në Los Anxhelos vazhdon.
“Departamenti i Mbrojtjes po mobilizon menjëherë Gardën Kombëtare për të mbështetur forcat federale të rendit në Los Anxhelos. Nëse dhuna vazhdon, marinsat nga baza Pendleton do të aktivizohen gjithashtu, ata janë në gatishmëri të lartë”, shkroi Hegseth në platformën X.
Ngjarje të ngjashme ndodhën edhe të premten, kur protestuesit hodhën vezë ndaj makinave të ICE pasi agjentët arrestuan emigrantë të paligjshëm. Në pamje të publikuara të shtunën nga kreu i Patrullës Kufitare, Michael Banks, dhe të shpërndara nga këshilltari i Trumpit, Stephen Miller, shihen dhjetëra agjentë të armatosur me uniforma ushtarake përballë protestuesve.
Duke komentuar mbi këto incidente, Miller i quajti ato “kryengritje kundër rendit ligjor dhe sovranitetit kombëtar të SHBA”.
