Shërbimi i Inteligjencës së Jashtme të Rusisë ka “qortuar” Serbinë për dërgimin indirekt të municioneve në Ukrainë. A është kjo një shenjë se Moska do ta braktisë Presidentin Aleksandar Vuçiç?!
Për më shumë se dy vjet, rrjedha e municioneve serbe drejt Ukrainës përmes vendeve të treta ka qenë diçka e ditur.
Në një intervistë për Financial Times në qershor 2024, Presidenti serb Aleksandar Vuçiç, konfirmoi se afro 800 milionë euro municion i prodhuar në Serbi kishte përfunduar në Ukrainë përmes ndërmjetësve. Ai tha se “nuk është puna ime të kontrolloj se ku përfundon ai municion“, duke theksuar se “mijëra punëtorë serbë të industrisë së mbrojtjes duhet të paguhen.”
Megjithatë, deklarata tronditëse erdhi më 28 maj, kur SVR-ja ruse publikoi një komunikatë zyrtare ku akuzonte Beogradin se po “i fuste thikën pas shpine Rusisë”, duke dërguar municione për Kievin në mënyrë të tërthortë.
Edhe zëdhënësja e Ministrisë së Jashtme ruse, Maria Zakharova, ka deklaruar se “Rusia ka marrë parasysh garancitë publike të Presidentit Aleksandar Vuçiç për nisjen e një auditimi mbi bashkëpunimin ushtarako-teknik të Serbisë me partnerë të huaj”. Sipas saj, auditimi do të zbulojë nëse ka pasur shkelje apo dokumente lidhur me armatimet.
“Jemi të sigurt që Serbia e kupton qartë gamën e plotë të rreziqeve që paraqet mundësia që produktet ushtarake të bien në duart e regjimit të Kievit…Serbia duhet të veprojë për të mos hedhur hije mbi marrëdhëniet e mira mes vendeve tona”, ka thënë Zakharova.
Siç duket, Serbia po përpiqet të ruajë një ekuilibër të vështirë mes marrëdhënieve me Perëndimin dhe lidhjeve tradicionale me Rusinë. Nga njëra anë, ajo është kandidate për anëtarësim në Bashkimin Evropian dhe ka lidhje të forta tregtare me BE-në dhe nga ana tjetër, mban marrëdhënie të ngushta historike dhe strategjike me Moskën.
