Në seancën e zhvilluar këtë të enjte, bashkëpunëtori i drejtësisë, Erion Alibej, rrëfeu më tej në Apelin e GJKKO përpjekjet personale për gjetjen e personave që vranë vëllanë e tij, Endrit Alibej, në atë që njihet si “masakra e Bradasheshit”.
Alibej deklaroi se në fund të shkurtit 2020 kishte zhvilluar një takim me Nuredin Dumanin, të organizuar nga Arjan Spahiu, ku ky i fundit i kishte treguar emrat e ekzekutorëve të vëllait, duke përmendur konkretisht Talo Çelën, Besmir Haxhinë dhe Altin Ndocin.
“Talo është bërë i vështirë për t’u kapur, por unë di kush janë ekzekutorët e familjes tënde. Edhe tek vëllezërit Baho dhe djali i dajës kanë qenë po këta, më tha Dumani”, rrëfeu Alibej.
Pyetjes së prokurorit të SPAK-ut nëse e kishte ruajtur regjistrimin e bisedës me Nuredin Dumanin, i cili zgjati 2 orë e 48 minuta, Alibej u përgjigj “Jo”, duke pranuar se regjistrimi ishte fshirë.
Ai rrëfeu gjithashtu se i kishte dhënë 50 mijë euro Dumanit dhe një telefon të koduar përmes aplikacionit Sky ECC.
“Lekët ishin nga trafiku i drogës me kamion për transport punoja me aq pak miq që më kishin mbetur, drogën e çonin shofer rumun. Unë kisha rreth 200 mijë euro total”, tha Alibej.
Ai po ashtu shpjegoi paktin që kishte bërë me Nuredinin, duke theksuar: “I thashë Dumanit që do betohem në Kuran dhe do të fal gjakun e vëllait”, duke iu referuar faktit se Dashnor Dumani ishte personi i përfshirë në vrasjen e vëllait të tij, Endrit Alibej.
Në vijim të dëshmisë, Alibej tregoi se një natë pas takimit, Nuredini i kishte shkruar: “Vëlla, mbaroi i pari, shiko TV,” ku ai pa lajmet për vrasjen e Dorian Shkozës dhe Anxhelo Avdisë.
Ai zbuloi gjithashtu lidhjet e tij me një hoxhë në Tiranë, i cili ishte i përfshirë në tregtinë e armëve dhe ndihmonte blerjen e tyre, duke thënë vetëm: “Rrinte tek Fresku”.
Për më tepër, Alibej tha se kishte akses në sistemin TIMS përmes policit Leonard Alltja. Alibej tha se kontrollonte të gjitha hyrje-daljet të personave që dyshonte se ishin të përfshirë në masakrën e Bradasheshit, ku iu vra i vëllai. Alibej thotë se i kishte me foto të gjitha hyrje-daljet për të gjithë, nga Çopjat e Qosja.
“Ardian Çollaku doshte të lidhte kontakte. Prej tij unë kam marrë vesh për herë të parë se kush ishte Dashnor Dumani. Ai më tregoi se vëllai i tij kishte grabitur një kambist në lagjen Kala. Unë kisha sistemin TIMS që kontrolloja gjithë çka doja. Të gjithë këta emrat nisa ti identifikoj. I kisha më foto dhe gjithë hyrje daljet e tyre. Të gjithë, nga Çopjat, Qosja, Dumanin. Po grumbulloja shumë informacion. Jo se po harroja Suel Çelën. Ai kujtonte se më kishte lënë në gjumë, por unë nuk kam fjetur asnjëherë të vetme. Madje, mendoj se unë e kam lnë Suel Çelën në gjumë”, tha Alibej.
