Komisioni i Ankimimeve dhe Sanksioneve (KAS) ka rrëzuar ditën e sotme një ankesë të Partisë Demokratike për të përjashtuar anëtarin e kësaj trupe, Ilirjan Rusmajli nga shqyrtimet e kërkesave të saj për pavlefshmërinë e zgjedhjeve.
“KAS pasi shqyrtoi kërkesën e paraqitur nga pala ankuese e rrëzoi këtë pasi nuk jemi në kushtet e parashikuara nga neni 130 i kodës së procedurës administrative”, tha relatori i çështjes, Ervin Lako.
Vendimi u mor pasi demokratët kërkuan përjashtimin e anëtarit të KAS, Ilirjan Rusmajli nga shqyrtimi i kërkesës së saj për pavlefshmërinë e zgjedhjeve në Shkodër.
Në ankesë thuhej se Rusmali është në kushte njëanshmërie për shkak të pozicionit të tij në Presidencë, si këshilltar i kreut të shtetit Bajram Begaj.
Sipas PD-së, prania e Rusmalit në KAS, teksa ushtron edhe detyrën e këshilltarit ligjor të Bajram Begajt, paraqet një sërë problematikash të natyrës kushtetuese dhe ligjore, duke filluar nga fakti se ndërhyrja e institucionit të presidentit, bie ndesh me nenin 86 të kushtetutës.
“Përmes angazhimit të kabinetit të presidentit të republikës, cenohet rëndë parimi i neutralitetit politik dhe përfaqësimit të unitetit të popullit.”, thuhej në ankesë.
Gjithsesi, duket se argumentet e PD-së nuk janë marrë për bazë nga anëtarët e tjerë të KAS. PD-ja pritet që të vijojë të kërkojë përjashtimin e Ilirjan Rusmalit për të gjitha kërkesat ankimore të saj.
Vlen të theksohet fakti se Ilirjan Rusmali ishte i vetmi anëtar që votoi pro kërkesave të kandidatëve demokratë, Ilir Alimehmeti, Ilirjana Kuçana, Mimoza Hajdarmataj dhe Lisandër Hoxha, për ankimimin në KAS, të cilët kërkonin rinumërimin e votave preferenciale.
