Kryeministri britanik Keir Starmer ka deklaruar se Mbretëria e Bashkuar do të hyjë në një fazë “gatishmërie për luftë”, duke paralajmëruar se bota aktualisht po përjeton periudhën më të paqëndrueshme në dekada.
Gjatë një vizite në ambientet e një prej kompanive më të mëdha të mbrojtjes “BAE Systems” në Glasgow, Starmer prezantoi gjetjet kryesore nga një rishikim strategjik i mbrojtjes, i cili thotë se Mbretëria e Bashkuar duhet të jetë e përgatitur për konflikte të mundshme në Evropë ose në rajonin e Atlantikut.
“Kur kërcënohemi drejtpërdrejt nga shtetet me aftësi të përparuara ushtarake, mënyra më e mirë për t’i penguar ato është të jemi gati – dhe ta bëjmë të qartë. Paqja ruhet me forcë”, tha kryeministri britanik.
Si pjesë e planeve të reja, qeveria planifikon të ndërtojë deri në 12 nëndetëse sulmi dhe të investojë 15 miliardë paund në një program armësh bërthamore.
Starmer ka vendosur të rrisë shpenzimet e mbrojtjes në 2.5% të PBB-së deri në vitet 2027-28. Ekziston gjithashtu një ambicie për të arritur 3%.
Megjithatë, Starmer nuk bëri një premtim të prerë për një afat kohor përfundimtar se kur do të ndodhë rritja e buxhetit të mbrojtjes në 3% të PBB-së, gjë që ka tërhequr kritika nga opozita. Ai tha se objektivi ishte të arrihej kjo përqindje në mandatin e ardhshëm parlamentar, por se vendimi përfundimtar do të varet nga gjendja e ekonomisë dhe financave publike.
Megjithatë, propozimi i fundit i NATO-s është që vendet të shpenzojnë 5% të PBB-së për shpenzimet e mbrojtjes dhe sigurisë deri në vitin 2032. Kjo do të votohet më vonë këtë muaj.
Ministrja e mbrojtjes së Lituanisë e quajti angazhimin e Mbretërisë së Bashkuar prej 2.5% “lajm të vjetër” dhe i tha BBC-së se 3.5% duhet të jetë minimumi i domosdoshëm.
Kryeministrja daneze Mette Frederiksen i tha kanalit lokal DR Neës se 5% është e arritshme, por është “shumë vonë”, ndërsa tha gjithashtu se 3% nuk është e mjaftueshme.
