Ulet kufiri i moshës së fëmijëve që përdorin lloje të ndryshme të drogës, ndërsa ky fenomen po bëhet gjithnjë e më i madh dhe kërkon reagim urgjent nga institucionet, shkruan Alsat.
Kështu konstaton zyra e Avokatit të Popullit, pas analizave të bëra, ku është konstatuar se përdoruesi më i ri i drogës në Maqedoninë e Veriut është nën moshën 6 vjeçare.
Vendi nuk ka një bazë të centralizuar evidence për fëmijët si përdorues të substancave psikotrope, por të dhënat e policisë për vitin 2023 deri në qershor të vitit 2024, flasin për 130 fëmijë të evidentuar si përdorues droge.
“Sipas të dhënave që i kemi marrë nga të gjithë 8 sektorët e ministrisë së punëve të brendshme pa diskutim kanë evidentuar fëmijë përdorues të drogës edhe atë na 85 gjithsej në 2023 dhe në qershor të 2024 -45 raste të reja, diku 130 fëmijë përdorues të drogës janë evidentuar në sektorët për punë të brendshme… Pjesa më e madhe e fëmijëve që shfrytëzojnë janë të përkatësisë etnike maqedonase dhe shqiptare, ndërsa në numër më të vogël të përkatësisë etnike rome, turke dhe serbe. Përndryshe lloji më i shpeshtë i drogës që e përdorin janë marihuana dhe amfetamina, ndërsa më pak ekstaza dhe heroin… Shqetëson e dhëna se ka pasur fëmijë nën moshën 6 vjeçare”
Zëvendësja e Avokatit të Popullit, Vaska Bajramovska Mustafa theksoi se në vend nuk është i zhvilluar mjaftueshëm sistemi për parandalim, zbulim të hershëm, trajtim dhe rehabilitim të këtyre fëmijëve ndërsa mungon edhe bashkëpunimi ndërinstitucional.
“Në shtet nuk kemi institucion të specializuar që do të mund të trajtonte fëmijë përdorues të drogës… I drejtojnë fëmijët nëpër klinika në Shkup, në klinikën për psikiatri dhe toksikologji, mirëpo këtu bëhet vetëm tejkalimi momental i gjendjes së fëmijëve sepse nuk ka masë tjetër që ndërmerret për trajtim dhe rehabilitim të fëmijës”, tha Vaska Bajramovska Mustafa, zëvendëse e Avokatit të Popullit.
Avokati i Popullit rekomandon zhvillim të programit nacional për trajtim dhe rehabilitim, përmirësim të masave parandaluese, rritje të kapaciteteve institucionale, përforcim të bashkëpunimit ndërinstitucional dhe ndryshime ligjore dhe përmirësim të kornizës juridike./ Alsat.mk
