Kreu i Partisë, Lëvizja Bashkë, Arlind Qori i ftuar në Euronews Albania, zbuloi se kush do të hyjë në parlament pasi partia e tij fitoi një mandat në Tiranë. Qori u shpreh se në karrigen e parlamentit do të ulet Redi Muçi, si kandidati i parë në listat e mbyllura të Lëvizjes Bashkë.
“Jo, nuk do te futem në Parlament, sepse unë isha i dyti ne lista ne fituam një deputet, i pari në listë ishte Redi Muçi, Unë nuk do të jem në parlament por kjo nuk do të ndryshojë aktivizimin tim në Lëvizjen Bashkë, unë do të jem gjithandej përveçse në karrigen e parlament”, tha Qori.
Lëvizja Bashkë e Arlind Qorit, në rang vendi mori 24621 vota. Më shumë se gjysmën i pati në Tiranë, ku dhe arriti të fitojë dhe mandatin e saj të vetëm.
Ndërkohë në shtator në parlament përveçse Rejdi Muçit, do të kemi edhe 3 deputetë të tjerë të dalë nga forcat politike të reja.
Edhe pse në të gjithë vendin, grumbulloi mbi 64 mijë vota, Nisma Shqipëria Bëhet mori vetëm një mandat në Tiranë. E para në listën e fiksuar është Ana Dajko, por ajo sipas deklaratave të mëparshme të krerëve të koalicionit është vendosur formalisht dhe nuk do të marrë mandatin, por në vend të saj në parlament do të ulet Adriatik Lapaj.
Mundësia, e Agron Shehajt, arriti të marrë 2 vende në parlament. Shtatori rikthen në Kuvend edhe Tom Doshin që me 49890 vota në total ruajti tre karrige në parlament.
