Një 48-vjeçar me iniciale S. H., ka rënë në prangat e policisë, pasi akuzohet se ka kultivuar 136 bimë narkotike në fshatin Rranxë të Krujës.
Policia bën me dije se vazhdojnë kërkimet për bashkëpunëtorin e tij.
Gjatë veprimeve operacionale të kryera dje policia sekuestroi automjetin e shtetasit S. H (i arrestuari) dhe automjetin e bashkëpunëtorit të tij, shtetasit A. H., në të cilat u gjetën pesticide që përdorën në bujqësi.
“Si rezultat i kontrolleve të mbështetura te informacionet e inteligjencës policore, për kapjen e 2 shtetasve të cilët u identifikuan si bashkautorë të kultivimit të 136 bimëve narkotike, në fshatin Rranxë, shërbimet e Komisariatit të Policisë Krujë në bashkëpunim me Komisariatin e Policisë Nr. 5, lokalizuan dhe vunë në pranga njërin prej tyre, konkretisht shtetasin S. H., 48 vjeç.
Gjatë veprimeve operacionale të kryera dje u sekuestruan me cilësinë e provës materiale, automjeti i shtetasit S. H. dhe automjeti i bashkëpunëtorit të tij, shtetasit A. H., në të cilat u gjetën pesticide që përdorën në bujqësi.”- njofton policia.
Materialet procedurale iu referuan Prokurorisë së Tiranës, për veprime të mëtejshme.
