Janë zbardhur detaje të reja nga shpërthimi me tritol i regjistruar mbrëmjen e djeshme brenda rrethimit të burgut të sigurisë së lartë të Fushë-Krujës.
Mësohet se bomba ishte artizanale, e krijuar me nitrat. Lënda plasëse është hedhur pranë gjeneratorit të burgut, por dyshohet se sasia ka qenë e vogël dhe nuk ka shkaktuar dëme materiale apo njerëz të lënduar. Shpërthimi është dëgjuar nga ana e administratës së burgut, të cilët më pas telefonuan Policinë.
Sulmi me tritol mund të ketë patur si qëllim krijim e një rrëmuje dhe tentativën për t’u arratisur të ndonjë të burgosuri, gjithsesi, kjo mbetet vetëm në kuadrin e dyshimeve.
Policia ka dyshime se lënda plasëse është hedhur nga një person me kapuç nga jashtë ambientit të burgut. Grupi hetimor ka sekuestruar pamjet filmike të kamerave të sigurisë së burgut, të cilat mund të kenë filmuar autorën dhe mund të ndihmojnë për ta identifikuar atë.
