Tashmë është zyrtare: Sergio Conceição nuk do të jetë më trajner i Milanit. Klubi kuqezi ka bërë publik njoftimin nëpërmjet një komunikate zyrtare:
“AC Milan dhe Sérgio Conceição nuk do të vazhdojnë rrugëtimin së bashku në sezonin e ardhshëm.
Klubi dëshiron ta falënderojë Sérgio-n dhe stafin e tij për angazhimin, profesionalizmin dhe përkushtimin e treguar në drejtimin e Ekipit të Parë gjatë këtyre muajve.
Emëruar më 30 dhjetor 2024, Conceição e mbyll përvojën e tij në pankinën kuqezi vetëm 5 muaj më vonë.
Megjithatë, ai largohet duke shtuar një trofe në muzeun e klubit – Superkupën e Italisë, të fituar pak ditë pas ardhjes në Milanello.
Por, kjo fitore nuk mjaftoi për të ruajtur vendin: kampionati i mbyllur në vendin e 9-të dhe humbja në finalen e Kupës së Italisë ndaj Bolognës shënuan një bilanc zhgënjyes për objektivat e klubit.
Në total, Conceição drejtoi Milanin në 31 ndeshje, duke regjistruar 16 fitore, 5 barazime dhe 10 humbje.
Largimi i Conceição-s i hap rrugën rikthimit të Massimiliano Allegrit, i cili do të ulet për herë të dytë në pankinën kuqezi, pas periudhës së parë të suksesshme që kulmoi me titullin kampion në vitin 2011.
Klubi tashmë po përgatitet për një kapitull të ri me një trajner të provuar dhe me autoritet, që pritet të sjellë stabilitet dhe ambicie të reja në Milanello.
