Nga bizneset e mëdha, të mesme dhe ato të vogla, të vetëpunësuarit apo edhe të dypunësuarit janë kategoritë që do të preken nga marrëveshja e publikuar nga Drejtoria e Tatimeve për debitorët, të cilëve mund t’u bllokohen automjetet.
Ekspertët kontabël shpjegojnë se si mund të preken të gjitha kategoritë e përcaktuara.
“Objekti i marrëveshjes janë të gjitha bizneset e të gjitha segmenteve, pra që nga të vetëpunësuarit, bizneset e vogla, të mesme dhe të mëdha, të cilët kanë detyrime tatimore të pashlyera. Natyrisht është një masë për të disiplinuar dhe për të paguar ato borxhe tatimore, dhe nga ana tjetër, individë të ndryshëm të cilët deklarojnë të ardhurat — ata që janë me dypunësim apo ata që deklarojnë të ardhurat vjetore të tyre — por ndoshta, në mungesë të asaj që mund të përmbajë marrëveshja, mund të jenë edhe ata që kanë detyrime ndaj organeve tatimore qendrore. Pra, nuk përfshihen këtu detyrimet ndaj bashkive, pasi është një marrëveshje e tatimeve qendrore me DPSHTRR.”
Për ekspertët, një marrëveshje e tillë nuk është e hartuar siç duhet, pasi lë vend për evazion dhe korrupsion.
Eduard Gjokutaj, ekspert kontabël: “Natyrisht që nuk del jashtë kontureve të ligjit, është një marrëveshje brenda procedurave tatimore, por duhet të marrë në konsideratë edhe kontekstin në të cilin zbatohet, për të mos ndikuar në atë çfarë janë të drejtat e tatimpaguesit, ku e para është e drejta e ankimit deri në nivelet e gjykatës.”
Edhe më e padrejtë bëhet kjo marrëveshje, sipas ekspertëve, nëse zbatohet dhe ndikon në aktivitetin ekonomik të individëve apo edhe të bizneseve.
“Pasi në rastet e caktuara një borxh i vogël tatimor mund të ndikojë në jetën ekonomike apo në efektet ekonomike të atyre bizneseve ose individëve që e përdorin mjetin si mjet pune. Natyrisht që, në vend që të krijojë një rregull neutral, ndërhyn në vendimmarrjen e bizneseve dhe jep efekte të kundërta.”
Marrëveshja parashikon bllokimin e automjeteve për ata tatimpagues të cilët nuk kanë shlyer detyrimet, qofshin edhe në vlera jo shumë të mëdha./TCH
